काठमाडौं । सिरहा मिर्चैया नगरपालिका स्थायी घर भएका महेन्द्र श्रेष्ठले आफ्नो छोराको मृत्युको जिम्मेवारी काठमाडौंको थापाथलीमा रहेको द ब्रिटिश कलेजले लिनुपर्ने बताएका छन् ।
उनले शनिबार पत्रकार सम्मेलन गर्दै भने, ‘कलेजको लापरवाहीकै कारण मेरो छोराको ज्यान गयो । कलेजले यसको जिम्मेवारी लिनुपर्छ ।’ श्रेष्ठले द ब्रिटिश कलेजमा स्नातक पहिलो वर्षमा अध्ययनरत आफ्नो छोरा गौरव श्रेष्ठको यही फागुन २ गते दुवई शैक्षिक भ्रमणको क्रममा निधन भएको भनेर काठमाडौंस्थित् द ब्रिटिश कलेजका एक जना शिक्षकले सुनाएको जनाए ।
उनले भने, ‘मेरो छोरा कलेजको टुरमा दुवई गएको थियो । तर, दुवईमै निधन भएको दुःखद् खबर कलेजका एक जना शिक्षकले ९८०११३४२०३ मोवाईल नम्बरबाट फोन गरेर सुनाउनुभएको हो ।’ छोराको निधन भएको भोलिपल्टै आफू घरबाट काठमाडौं आएको र कलेज प्रशासनसँग कुरा गर्दा उनीहरुले भ्रमणमा सहभागी कलेज प्रशासनका व्यक्तिहरुबाट ठूलो गल्ती भएको भनेर स्वीकार गरिएको पनि स्पष्ट पारे ।
दुवईमा आफ्नो छोरा हराएको आठ घण्टापछि मात्रै कलेजबाट भ्रमणमा सहभागी सदस्यहरुले खोजि गर्नु नै रहस्यमय भएको श्रेष्ठको भनाई छ । उनले भने, ‘मेरो छोरा हराएको घण्टौंपछि मात्रै खोजि भएको कुरा बाहिर आएको छ, यो अत्यन्तै दुःखदायी कुरा हो । घट्ना घटेको अन्दाजी आठ घण्टापछि मात्र मेरो छोराको खोजी गर्नु मलाई नाटकीय लाग्छ ।’
श्रेष्ठले भ्रमण तालिकामै नभएको स्विमिङ कार्यक्रममा विद्यार्थीहरुलाई कलेजले किन सहभागी गरायो ? भन्दै प्रश्नसमेत तेर्साए । उनले आफूले छोराको शब नबुझ्दासम्म कलेजले निकै चासो देखाएको तर दाहसंस्कार गरिसकेपछि कुनै वास्ता नगरेको पनि दुःखेसो पोखे ।
श्रेष्ठले थपे, ‘वास्ता त गरेन गरेन, कलेजले ममाथि उल्टै अभद्र व्यवहार गर्यो । अपशब्द बोल्यो ।’ उनले कलेजकै लापरवाहीका कारण आफ्नो छोराले अनाहकमा ज्यान गुमाएको गुनासो गरे । उनले भने, ‘यस सम्बन्धमा प्रहरी परिसर, टेकु, काठमाडौंमा जाहेरी गरि सक्दा पनि प्रहरी प्रशासनबाट कुनै पनि चित्तबुझ्दो पहल भएन् । मलाई यसमा दुःख लागेको छ ।’
भ्रमण दलमा सहभागी कलेजका म्याम रिना श्रेष्ठ र नविना महर्जनको र आफ्नो छोरासँगै समुन्द्रमा पौडी खेल्न गएका साथी निषेश सुवेदीको बयान नै फरक–फरक देखिएको पनि श्रेष्ठले सुनाए ।
उनले कलेजको जिम्मेवार व्यक्ति सिईओ नरेन्द्र कँडेल हाल लण्डनमा रहेको सुनाउँदै तुरुन्त काठमाडौं आई आफूसँग सम्पर्क गरि छलफल गर्नुपर्ने माग गरे । श्रेष्ठले भने, ‘कलेजले मसँग तत्काल वार्ता तथा छलफल गर्नुपर्छ । सिईओ अहिले लण्डनमा हुनुहुन्छ । उहाँले मसँग तत्काल छलफल गर्नुपर्छ ।’
उनले द ब्रिटिश कलेजले व्यापारीकरणको नाममा विद्यार्थीहरुलाई विदेश भ्रमणमा लैजाने गरेको पनि सुनाए । श्रेष्ठले थपे, ‘यसतर्फ राज्यले विशेष ध्यान पुर्याउनुपर्छ । कलेजले विद्यार्थीहरुसँग मोटो रकम असुलेर यसरी व्यापारीकरण गरिरहेको छ । यस्तो कलेजको अनुमतिपत्र नै खोस्नुपर्छ । यतातर्फ सरकारको यथाशिघ्र ध्यान जाओस् ।’
आफ्नो छोराको शव घर पठाउँदासमेत कलेजले लापरवाही गरेको उनले गुनासो गरे । श्रेष्ठले सुनाए, ‘सुरुमा कलेजले छोराको शब पठाउँछु भन्यो, तर पछि कलेजले फोन गरेर शब बाहनको पैसासमेत मलाई तिर्न भन्यो । पैसा तिर्नु ठूलो कुरा होईन, तर कलेजले अमानवीय व्यवहार देखायो ।’
