दशैंको मुखमा उपभोग्यवस्तुको चर्को मूल्यवृद्धि, ‘विचौलियालाई नेताको संरक्षण भएसम्म यस्तै हो’

काठमाडौं । चाडपर्व नजिकिएको मौका छोपेर जनताका दैनिक उपभोग्य वस्तुको अस्वाभाविक मूल्य वृद्धि गरिएको छ । खाने तेलसहित खाद्यान्न र तरकारीको मूल्य बढेको भन्दै उपभोक्ताले गुनासो गर्न थालेका हुन् । 

चाडपर्वको मौकामा धेरै नाफा कमाउन उपभोग्य वस्तुको चर्को मूल्य वृद्धि गर्ने, कृतिम अभाव सिर्जना गर्ने, कालोबजारी गर्ने प्रवृत्ति विगतका बर्षमा पनि रहँदै आएकोमा यस बर्ष पनि देखिन थालेको छ । गएको बर्षको यही अवधिको तुलनामा अहिले बजार भाउ सरदर ४० प्रतिशत बढेको उपभोक्ताकर्मीहरूको हिसाव छ । 

सम्वन्धित सरकारी निकायले मूल्यवृद्धि रोक्न र बजारमा विकृति बढ्न नदिन अनुगमन र कारवाहीलाई थप प्रभावकारी बनाउने काम भइरहेको दावी गर्दै आएका छन् । कालीमाटी फलफूल तथा तरकारी बजार विकास समितिको पछिल्लो विवरणअनुसार अधिकांश तरकारी तथा फलफूलको भाउ बढेको छ । कतिपयको भाउ दोब्बरसम्म बढेको देखिन्छ । उक्त बजारबाट किनेर धेरै खुद्रा बिक्रेताले नाफा खाएर बिक्री गर्ने भएकाले धेरै उपभोक्ताले अझ बढी मूल्य तिर्नुपर्ने बाध्यता छ । 

कालीमाटी तरकारी बजारमा करिव ३० प्रकारका वस्तुमा मूल्य बढेको देखिन्छ । विशेषगरी हरियो तरकारी, प्याज, लसुन, केही फलफूलको भाउ दोब्बरसम्म बढेको छ । खाने तलेको मूल्य पनि झण्डै दोब्बरले बढेको छ भने चामल, दाल, गेडाडुडीको मूल्य पनि बढाइएको छ । 

चाडपर्व नजिकिएसँगै विशेषगरी बिचौलिया ब्यापारीहरूले चलखेल गर्दै मूल्य बढाउने गरेको देखिन्छ । किसानबाट सस्तोमा यस्ता वस्तु खरीद गरी चर्को मूल्यमा बजारका थोक तथा खुद्रा व्यापारीलाई बिक्री गर्न पल्किएका बिचौलियालाई सरकारले अहिलेसम्म नियन्त्रण गर्न सकेको देखिन्न । 

उपभोक्ता अधिकारकर्मीले भने चाडपर्व मूल्य बढाउने प्रवृत्ति पूरानै भएको भन्दै यसमा प्रहरी प्रशासनको कमजोरी मूल्य रहेको औंल्याउँछन् । उपभोक्ता अधिकारकर्मी प्रेमलाल महर्जनले एउटा बाणिज्य विभाग वा जिल्ला प्रशासनले अनुगमन गरेको भरमा बजार भाउ नियन्त्रणदेखि अन्य समस्या समाधान नहुने बताउँछन् । 

उनका अनुसार जबसम्म कालोबजारी गर्ने, कृतिम अभाव सिर्जना गर्ने, अखाद्य वस्तु विकृति गर्ने, मौका छोपी मूल्य वृद्धि गरेर नाफा लिने व्यापारीदेखि विचौलियासम्मलाई राजनीतिक संरक्षण भइरहन्छ, तबसम्म यो समस्या कायम रहन्छ । यस्ता धेरै व्यापारी र विचौलिया दल तथा नेताको संरक्षणमा रहेको महर्जनको भनाई छ । 

नेता र ठूला व्यवसायीलाई बजार मूल्य बढेर कुनै असर नपर्ने र आम जनताको जीवनमा यसले गम्भीर समस्या पार्ने भन्दै उनले उपभोक्ता अधिकारकर्मी, नागरिक समाजका अगुवाले जति कराए पनि राजनीतिक नेतृत्व इमान्दार नभएसम्म बजार स्वच्छ नहुने बताए ।