तीन वर्षपछि बस्यो राखेपको बोर्ड बैठक, राष्ट्रिय खेलकुद प्रतियोगितामा ३६ खेल सहभागी गराइने

काठमाडौं । तीन वर्षपछि राष्ट्रिय खेलकुद परिषद् (राखेप)को ऐतिहासिक बोर्ड बैठक सम्पन्न भएको छ । राष्ट्रिय खेलकुद विकास ऐन २०७७ कार्यान्वयनमा आएपछि पहिलो पटक राखेपको बोर्ड बैठक बसेको हो । युवा तथा खेलकुद मन्त्री तथा राखेपका अध्यक्ष महेश्वर गहतराजको अध्यक्षतामा शुक्रबार बसेको बोर्ड बैठकले बिभिन्न महत्वपूर्ण निर्णयहरु समेत पारित गरेको छ । 

बैठकले आगामी जेठ २२ देखी २८ गतेसम्म गण्डकी प्रदेशमा आयोजना हुने नवौं राष्ट्रिय खेलकुद प्रतियोगिताकालागि तयार पारीएको “नवौं राष्ट्रिय खेलकुद प्रतियोगिता संचालन निर्देशिका-२०७९” पारित गरेको छ । साथै बैठकले प्रतियोगिताको मिति तय गरेर प्रतियोगिता संचालनकालागि सहमती प्रदान गर्ने नेपाल सरकार मन्त्रीपरिषदप्रति हार्दिक आभार समेत ब्यक्त गरेको छ । 

बैठकले नवौं राष्ट्रिय खेलकुद प्रतियोगिताका लागि आवश्यक लोगो, मस्कट र नारा तय गर्नकालागि आवश्यक प्रक्रिया अगाडि बढाउनुका साथै प्रतियोगिता मुल आयोजक कमिटि, कार्यकारी समिति, उप–समिति तथा सचिवालय गठन गर्ने निर्णय समेत पारित गरेको छ ।

एशियन खेलमा २३ खेल समावेश गर्ने निर्णय
शुक्रबार युवा तथा खेलकुद मन्त्रालयको हलमा सम्पन्न राखेपको बोर्ड बैठकले १९ औं एशियन खेलमा नेपालको तर्फबाट २३ वटा खेलमा सहभागी हुने निर्णय गरेको छ । 

शुक्रबार बसेको बैठकले तेक्वान्दो, कराँते, बक्सिङ, एथलेटिक्स, साईक्लिङ, महिला फुटबल, गल्फ, कुस्ती, भारत्तोलन, जुडो, पौडी, ट्रायथेलेन, उसु, आर्चरी, बास्केटबल, कबड्डि, फेन्सीङ, ह्याण्डबल, टेबल टेनिस, महिला भलिबल, पुरुष क्रिकेट, सुटिङ र ब्याडमिन्टनमा सहभागीता जनाउने निर्णय गरेको हो । 

यसअघिका एशियन खेलमा खेलाडीहरुले देखाएको उत्कृष्ट नतिजा तथा पछिल्लो समयमा सफलता प्राप्त भईरहेका खेलहरुका आधारमा एशियन गेम्समा २३ वटा खेल समावेश गर्ने निर्णय गरीएको हो । बैठकले एशियन खेलकुदमा सहभागी हुने खेलाडीहरुको छनौट, बन्द प्रशिक्षण तथा आवश्यक बजेट र तयारीका सम्बन्धमा समेत प्रक्रिया अगाडी बढाउने निर्णय गरेको छ । बैठकले बिभिन्न संघ संस्थाको निर्देशिका तथा जापानमा भएको ओलम्पिकमा सहभागी हुँदाको खर्च पारित गर्नेदेखी आगामी आर्थिक वार्षकालागि आवश्यक बजेट माग गर्नेसम्मको निर्णय पारीत गरेको छ ।

बैठकमा बोल्दै युवा तथा खेलकुद मन्त्री तथा बैठकका अध्यक्ष महेश्वर गहतराजले खेलकुदको महाकुम्भका रुपमा रहेको राष्ट्रिय खेलकुद प्रतियोगितालाई निर्धारित समयमै सम्पन्न गर्नु सबैको दायित्व रहेको बताए । उनले निर्धारित समयमै प्रतियोगिता संचालन गर्न नसकिए थप एक वर्ष खेर जाने भएकाले दत्तचित्त भएर प्रतियोगितामा केन्द्रित हुन निर्देशन समेत दिए । 

“हामी दुई वर्ष ढिला भईसकेका छौं” मन्त्री गहतराजले भने, “निर्धारित समयमै प्रतियोगिता गराउन सकिएन भने फेरी एक वर्ष पछि धकेलिनेछौं, त्यसैले निर्धारित समयमै प्रतियोगिता सम्पन्न गराउनु अपरिहार्य छ ।”

एनआरएनसहित ११ टिम सहभागी हुने 
नवौं राष्ट्रिय खेलकुद प्रतियोगितामा सहभागी टिमको सँख्या बढ्ने भएको छ । राष्ट्रिय खेलकुद परिषदका सदस्य सचिव टंकलाल घिसिङका अनुसार तीन विभागीय टिम र ७ प्रदेशका टिमका अलावा यस पटक एनआरएनको टिमलाई समेत प्रतियोगितामा सहभागीता गराउने तयारी भईरहेको छ । पर्यटन प्रवद्र्धनका लागि खेलकुद सबैभन्दा बलियो माध्यम हुनसक्ने भएकाले नवौं राष्ट्रिय प्रतियोगितामा एनआरएनको टिमलाई समेत सहभागी गराउने प्रयास भईरहेको घिसिङले जानकारी दिए ।