सौराहा भारतीय र बंगलादेशी पर्यटकको विवाहका लागि पनि आकर्षिक गन्तव्य बन्दै

काठमाडौं । क्षेत्रीय होटल संघ चितवनका अध्यक्ष दीपक भट्टाराइले विगत केही वर्षदेखि भारतीय पर्यटकहरु विवाह समारोहका लागि चितवनमा आकर्षक भएको बताएका छन् । 

कर्पोरेट नेपालसँगको कुराकानीमा उनले भने, यो सिजनमा हामीले धेरै विवाह समारोहहरु सोराहामा गयौं । यो ठाउँ इण्डिया, भैरहवा, बुटवलबाट पनि नजिक पर्ने भएकोले विवाह समारोहका लागि राम्रो गन्तव्य बन्न सक्ने  भनेर हामी पहल पनि गरेका छौं । यो ठाउँलाई कसरी प्रचार प्रचार गर्न सकिन्छ ? विवाह मात्रै नभएर ब्रतवन्ध जस्ता अरु कार्य र समारोहहरु पनि गर्ने उपयुक्त ठाउँको रुपमा हामीले विकास गरिरहेका छौं । सरकारले पनि यस कुरालाई कार्ययोजनामा राखेकोमा हामी पर्यटन व्यवसायी खुःसी नै छौं ।’

भट्टराईले आउँदो महिनाको लागि विवाह गर्न वुकिङहरु आइरहेको बताए । सोधपुछ पनि धेरै आइरहेको भन्दै उनले सौराहामा भारतीय र आन्तरिक पर्यटकका कारण चहल पहल निकै बढेको बताए । 

कोभिडअघि  विवाह र घुम्नका लागि आउने भारतीय पर्यटकहरुको संख्या निकै ठूलो रहेको थियो । चिनियाँ र अन्य देशका पर्यटकका लागि कोठा पाउनै मुस्किल समय हो यो भन्दै भट्टराईले कोरोना महामारीको समयमा संख्या निकै घटे पनि महामारीको प्रभाव घटेपछि ३५ प्रतिशत भारतीय पर्यटक रिकभर भएको बताए । 

उनले भने, ‘अहिले चाहिं अफ सिर्जन भएकोले खासै पर्यटकको चहलपहल छैन् । भद्रो लागेपछि चाहिं चाडपर्व लागेर पूरानो अवस्थामा पर्यटन व्यवसाय फकिन्छ कि भन्ने आशा छ । अहिले वर्षायाम पनि छ । बाटोको अवस्था पनि राम्रो छैन् । कोरोना महामारीले विदेशी पर्यटकहरु आउन सकिरहेका छैनन् । यहाँ आउने अधिकांश पर्यटक भारतीय र आन्तरिक हुन् । विस्तारै विदेशी पर्यटकहरु पनि आउने क्रम बढेको छ ।’ 

पर्यटन क्षेत्र पूरानै लयमा फर्किने आशामा व्यवसायीले होटल, रेष्टुरेन्टलगायतका व्यवसायमा रङ लगाउने, पुनर्निर्माणको कार्य पनि सुरु गर्न लागेका छन् । अहिले नयाँ होटलहरु निर्माणको काम पनि भइरहेको छ । सधै कोरोनाको कहर आउँछ भनेर रोगसँग डराएर बस्यो भने कहिल्यै पनि उँभो  लाग्दैन् । रोगसँग पनि डराउनु पयो । रोगभन्दा भोकसँग पनि डराउनु पर्ने अवस्था छ ।’ 

सरकारले भारतीय र बङ्गलादेशीको लोकप्रिय गन्तव्यको रुपमा चितवन, पोखरा लगायतका गन्तव्यहरुलाई विकास गर्ने बताएको छ । यससँग सम्बन्धित हवाई तथा स्थल यातायात सेवाको अन्तरआवद्धता र सञ्ञालीकरणको अभिवृद्धि गर्ने संस्कृति, पर्यटन तथा नागरिक उड्डयन मन्त्रालयले आफ्नो पर्यटन पुनरूत्थान कार्ययोजनामा उल्लेख गरेको छ । 

नेपाल पर्यटन बोर्डका निर्देशक मणिराज लामिछानेले गएको जुलाई महिनामा ४४ हजार ४६२ जना पर्यटक नेपाल भित्रिएको बताउँदै भारतीय पर्यटकको आगमन उत्साहजनक रहेको बताए । जुलाई महिनामा मात्र भित्रिएका कुल ४४ हजार ४६२ मध्ये ३८.९ प्रतिशत भारतीय रहेको उनले जानकारी दिए ।