ठमेललाई सुरक्षित र व्यवस्थित बनाउने हिसावले अनुगमन सुरु गरेका हौंः भविश्वर शर्मा

काठमाडौं । राजधानी काठमाडौंको पर्यटकीय क्षेत्र ठमेल पर्यटन विकास परिषदले ठमेललाई सुरक्षित र व्यवस्थित बनाउने हिसाबले अनुगमन सुरु गरेको बताएको छ । कोरोना महामारीका कारण सुस्ताएको ठमेलको पर्यटन व्यवसायमा अहिले केही सुधार आएको छ । 

ठमेल पर्यटन विकास परिषदका अध्यक्ष भविश्वर शर्माले ठमेललाई सुरक्षित बनाउने हिसाबले अनुगमन सुरु गरेको बताए । ठमेलमा पारिवारिक वातावरण सिर्जना गर्ने उद्देश्यले काठमाडौं महानगरपालिकाका नगर प्रहरी, सोह्रखुट्टे र दरबारमार्ग विटका प्रहरी पर्यटन प्रहरी, ट्राफिक प्रहरी, ठमेलका घरधनी र व्यवसायीको बैठक बसेर यो अभियान सुरु गरेको बताए । 

यो अभियान करिब एक महिना चल्ने उनले बताए । त्यसपछि एक महिनाको कामको समीक्षा गरेर नयाँ कार्यक्रम ल्याउने शर्माले बताए । उनले अहिले ठमेलका होटल व्यवसायीहरुले ध्वनी प्रदुषणका कारण ग्राहकहरु राख्न सकिएन भनेर गुनासो गर्ने गरेको सुनाउँदै त्यस्तो अवस्था कहाँ कहाँ छ ? भनेर अनुगमन गरेको पनि बताए । 

आफ्नो व्यवसाय सञ्चालन गर्दा एकअर्को व्यवसायलाई असर नपर्नेगरी गर्न सबैलाई परिषदले सचेत गराएको शर्माले बताए । यस्तो समस्यामा कसैलाई मर्का परेमा मर्का पार्नेलाई कानुनी उपचारमा लगेर कारवाही गर्ने उनले बताए । 

अहिले ठमेलमा सीसीक्यामरा जडानको काम सुरु भइसकेको जानकारी दिँदै शर्माले ठमेलमा जाउँ, ठमेलमा बसौं, ठमेलमा खाऔं भन्ने वातावरण सिर्जना गर्न आफूहरु लागेको बताए । परिषदले सामुहिकरुपमा सुरक्षाकर्मी तथा निजी निजी गार्डहरु राख्ने कुरा भइरहेको बताउँदै ठमेलमा हरेक शुक्रबार बेलुका ७ बजेदेखि १२ बजेसम्म सडक महोत्सव गर्ने योजना रहेको बताए । 

ठमेलका सडकहरुमा ठेलामा राखेर फास्ट फुड बेच्ने, मासु पोल्ने कुराले वातावरण प्रदुषित हुनुका साथै वरिपरिका होटल तथा रेस्टुरेटलाई असर परेको, पर्यटकहरुले पनि गुनासो गरेको उनको तर्क छ । शर्माले यस्ता सडक व्यवसाय बन्द गर्न भनेको बताउँदै सडकमै माग्ने र सुत्ने १२–१३ जना मानिसहरु भेटिएकाले उनीहरुलाई मानव सेवा आश्रममा लगेर राख्ने बताए । 

ठमेललाई एक महिनाभित्रमा सुरक्षित, प्रदुषणमुक्तसँगै सडकहरु पिच (कालोपत्रे) गरिसक्ने र पार्किङस्थलको तथ्यांक संकलन गरी ट्राफिक व्यवस्थापन मिलाएपछि हरेक शुक्रबार साँझ सडक महोत्सव आयोजना गर्ने उनले बताए । व्यवसायीको मागअनुसार यस्तो महोत्सव गर्न लागेको शर्माले बताए । कोरोना महामारीमा ठमेल छोडेर गएकाहरु अहिले फर्किसकेको दावी गर्दै यही बर्ष १०–१५ वटा होटल सञ्चालनमा आइसकेको बताए । 

अहिले होटलहरुमा ७०–८० प्रतिशत पर्यटकले भरिए पनि ठमेलमा सटरमा व्यवसाय गर्नेहरुको अवस्था भने राम्रो छैन् । आर्थिक मन्दीका कारण धेरै व्यापार व्यवसाय सुस्त हुन पुगेको हो । ठमेलमा सामान महंगो हुने भएकाले सो ठाउँमा बस्ने पर्यटकहरु सामान किन्न अन्यत्र जाने गरेका छन् । शर्माले ठमेलमा आएका पर्यटकहरु सहज र सुरक्षितरुपमा हिंडडुल गर्ने वातावरण आफूहरुले मिलाएको बताए ।