विद्यालय शिक्षा विधेयकमा हाम्रो अस्तित्वलाई स्वीकार गरिएन्ः अभिभावकहरु

काठमाडौं । प्रश्तावित विद्यालय शिक्षा विधेयकमा अभिभावकहरुको अस्तित्वलाई स्वीकार नगरिएको भन्दै असन्तुष्टि व्यक्त गरिएको छ । 

मंगलवार संसदको शिक्षा, स्वास्थ्य तथा सूचना प्रविधि समितिको बैठकमा अभिभावकहरुका प्रतिनिधिले प्रश्तावित विद्यालय शिक्षा विधेयकमा अभिभावकहरुको अस्तित्वलाई स्वीकार नगरेको भन्दै असन्तुष्टि व्यक्त गरेका हुन् । 

भण्डारीले भने, ‘हाम्रो आपत्तिको विषय के छ भने दफा १५३ मा नेपाल शिक्षक महासंघलाई राखिएको छ । अभिभावकहरुको त चिनारी नै छैन । यत्रो ठूलो व्यवस्थापन समितिमा बस्ने र आम रुपमा अभिभावकहरुको प्रतिनिधित्व गर्ने संस्थालाई पनि सम्बोधन गर्ने कुरा छुटेको छ । यो खेदजनक कुरा छ । यसलाई कहीँ न कहीँ रुपबाट समेटिनु पर्छ र अभिभावक संघहरुलाई समेट्नुपर्छ भन्ने हाम्रो जोडदार माग रहेको छ । विधेयकमा सिटिइभिटीको बारेमा एक शब्द पनि खर्च गरिएको छैन ।’

अभिभावक महासंघका अर्का प्रतिनिधि केशव पुरीले विधेयकमा अभिभावक भन्ने शब्द कतै नआएको भन्दै आपत्ति जनाए । उनले अभिभावकहरुको कुनै माग नभएको भन्दै शिक्षामा भएका गलत कुराहरुलाई औँल्याएर राज्यलाई सल्लाह दिने अवस्था बन्नुपर्ने बताए । 

पुरीले सरकारी विद्यालयमा राज्यले गरेको खर्चको प्रतिफल नखोजिएको भन्दै चिन्ता व्यक्त गरे । उनले भने, ‘शिक्षा मन्त्रालयले अभिभावक संघलाई कुनैपनि ठाउँमा सम्बोधन गर्ने गरेको छैन । अभिभावकहरुको कुनै पनि माग होइन । शिक्षामा भएका गलत चिजहरु औँल्याएर राज्यलाई सल्लाह पनि दिन नपाउने अवस्था सिर्जना भयो । अहिलेको शिक्षा विधेयकमा अभिभावक भन्ने शब्द कहीँ पनि छैन । अभिभावक हुँदा त राज्यलाई सहयोग हुन्छ नि । सरकारी विद्यालयमा राज्यले गरेको खर्चको राज्यले कुनै प्रतिफल खोजेको छैन ।’

विदेशमा अध्ययनरत विद्यार्थीहरुको अभिभावक संघका अध्यक्ष नवराज काफ्लेले अभिभावकहरुलाई सामुदायिक विद्यालयहरुप्रति विश्वास नभएका कारण आफ्ना बालबालिका नीजि विद्यालयमा पढाइरहेका बताए । उनले सामुदायिक विद्यालयलाई व्यवस्थित गरेमा निजी विद्यालयमा जानेहरुको संख्या स्वतः घट्ने बताए । 

काफ्लेले भने, ‘अभिभावकलाई सामुदायिक विद्यालयप्रतिको विश्वास छैन । हामी नीजिलाई गालि गर्छौं । नीजिलाई गालि गर्नै पर्दैन । सामुदायिक विद्यालय राम्रो बनाऔँ । सामुदायिक विद्यालय राम्रो भएपछि निजी विद्यालयहरु स्वतः घट्छन् । सामुदायिक विद्यालयलाई राम्रो व्यवस्थित गर्न नसकेको कारणले, त्यहाँको व्यवस्थापन राम्रो नभएको कारणले, यसमा अभिभावकको विश्वास नभएको कारणले ती अभिभावकहरु नीजि विद्यालय खोज्दै गएका हुन् ।’