रुकुमपश्चिम । रुकुम पश्चिममा गए राति आएको बाढीले घर बगाउँदा मृत्यु भएका तीन बालिकाको शव निकालिएको छ ।
आठविसकोट नगरपालिका वडा नम्बर १२ को झिन्चौर बगरमा तातोपानी र झिन्चौर खोलाको बाढीले घर बगाउँदा घरमै पुरिएर मृत्यु भएका तिन बालिकाको शव निकालिएको हो ।
नगर प्रमुख रबी केसीका अनुसार बाढीले घर बगाउँदा पुरिएर मृत्यु भएका १० वर्षीया हितमाया पुन, आठ वर्षीया धनसा पुन र चार वर्षीया मनीषा सार्कीको शव निकालिएको हो ।
बाढीले घर बगाउँदा बेपत्ता भएका स्थानीय ४० वर्षीया डिल्ली बहादुर बुढाथोकीको खोजी कार्य भइरहेको नगर प्रमुख केसीले बताए । उनी बसेको घरमै परिएको हुन सक्ने आशङ्का गरिएको छ । लेदोसहितको बाढीले घर पुरिएको छ । डोजर लगाएर लेदो हटाउने तयारी भइरहेको छ ।
घटनामा परेर घाइते भएका सात जनाको भने आठविसकोटस्थित नगर अस्पतालमा उपचार भइरहेको छ । स्थानीय १२ वर्षीया विनय सार्की, २२ वर्षीया मनीषा पुन, २९ वर्षीया जनक खत्री, ६ वर्षिया मनसरी पुन, चार वर्षीया मेक्सन पुन, २८ वर्षीया धनमाया पुन र ६५ वर्षीया कल्पना कामी घाइते भएका छन् ।
आठबिसकोटको वडा नम्बर १०, ११ हुँदै आउने गिजागार खोलामा आएको बाढीले घर बगाउँदा उक्त घटना भएको बताइएको छ । बाढीले अन्य स्थानका घर र घट्ट समेत बगाएको छ । घटनाको पूर्ण विवरण सङ्कलन हुँदै गरेको नगर प्रमुख केसीले बताए ।