शनिबार ५ असोज, २०८१ | Saturday Sep 21, 2024
काठमाडौं । संघीय संसद्अन्तर्गत आज ६ वटा संसदीय समितिको बैठक बस्दैछ ।
कानुन, न्याय तथा मानव अधिकार; महिला तथा सामाजिक मामिला; राज्य व्यवस्था तथा सुशासन; राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन, विकास; आर्थिक मामिला तथा सुशासन र विधायन व्यवस्थापन समितिको बैठक आज बस्न लागेको हो ।
कानुन, न्याय तथा मानव अधिकार समितिको बैठक बिहान ११ बजे बस्नेछ । बैठकमा विधायन सम्बन्धमा व्यवस्था गर्न बनेको विधेयकमा दफावार छलफल गर्ने संघीय संसद् सचिवालयले जनाएको छ ।
त्यस्तै महिला तथा सामाजिक मामिला समितिको बैठकमा देशको समग्र विकासको मूल प्रवाहमा आउन नसकेका वर्ग र समुदायको मानवअधिकारका विषयमा छलफल हुनेछ ।
बैठक दिउँसो ३ः४५ बजे सुरु हुनेछ ।
बिहान ११ बजे अर्को राज्य व्यवस्था तथा सुशासन समितिको बैठकमा भ्रष्टाचार निवारण ऐन, २०५९ लाई संशोधन गर्न बनेको विधेयकका सम्बन्धमा छलफल हुनेछ ।
बैठक बिहान ११ बजे बस्नेछ ।
त्यसैगरी दिउँसो साढे १ बजे बस्ने राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठकमा समितिको कार्यविधि र राज्यका निर्देशक सिद्धान्त तथा नीतिहरूका सम्बन्धमा छलफल हुने सचिवालयले जनाएको छ ।
साथै, विकास, आर्थिक मामिला तथा सुशासन समितिको बैठकमा ‘सुशासन’ र यसको प्रवर्द्धन गर्न ‘राष्ट्रिय सदाचार नीति’ जारी गर्ने सम्बन्धमा सरोकारवालासँग छलफल हुनेछ ।
बैठक साढे ११ बजेका लागि बोलाइएको छ ।
बिहान साढे ११ बजे नै बस्ने विधायन व्यवस्थापन समितिको बैठकमा उत्तरविधायिकी परीक्षण सम्बन्धमा छलफल गर्ने कार्यसूची रहेको सचिवायलयले जनाएको छ ।
