बुधबार २१ कात्तिक, २०८१ | Wednesday Nov 06, 2024
काठमाडौं । बैंकिङ प्रणालीमा अधिक तरलता थुप्रियसँगै केन्द्रिय बैंकले आज एक खर्ब रुपियाँ तरलता उठाउने भएको छ । निक्षेप संकलन उपकरणको माध्यमबाट राष्ट्र बैंकले बुधबार एक खर्ब रुपियाँ प्रशोचन गर्ने भएको हो ।
त्यसो त यसअघि ७ दिन, १४ दिनका लागि यस्तो तरलता प्रशोचन गर्ने गरिएपनि यसपटक केन्द्रीय बैंकले २१ दिन अर्थात् तीन हप्ताका लागि तरलता प्रशोचन गरिने जनाएको छ । इच्छुक बैंक तथा वित्तीय संस्थाहरुले आज अपराहन्न २ बजेसम्म आवेदन दिन सक्नेछन् । २ बजे हुने सार्वजनिक बोलकबोलमार्फत निक्षेप संकलन उपकरणको खरिद बिक्री आजै हुनेछ ।
राष्ट्र बैंकको पछिल्लो रिपोर्ट अनुसार कात्तिक १३ गतेसम्म बैंक तथा वित्तीय संस्थाहरुले ६६ खर्ब २१ अर्ब रुपियाँ निक्षेप संकल गर्दै यता ५२ खर्ब ८२ अर्ब रुपियाँ कर्जा लगानी गरेका छन् । समीक्षा अवधिमा जम्मा ७८.४४ प्रतिशत मात्र सीडी रेसियो (कर्जा/निक्षेप अनुपात) कायम गरेका बैंकहरुसँग ८ खर्बमाथि लगानी योग्य रकम रहेको छ । जुन तरलता बैंकहरुले उत्पादनशील क्षेत्रमा लगानी गर्न नसक्दा केन्द्रीय बैंकले निक्षेप संकलन उपकरणको माध्यमबाट तान्न लागेको हो ।
केन्द्रीय बैंकले बजारमा तरलताको अभाव हुँदा रिपोमार्फत तरलता प्रवाह गर्ने गर्छ भने बजारमा अधिक तरलता हुँदा रिभर्स रिपो अर्थात् निक्षेप संकलन उपकरणको माध्यमबाट तरलता प्रशोचन गर्ने गर्छ ।
