दाङः काँग्रेसको चुनावी सभालाई लक्षित गर्दै मंगलबार तुलसीपुरमा भएको बम विस्फोटा इलाका प्रहरी कार्यालय तुलसीपुरका म्यादी प्रहरी विनोद चौधरीसहित नौ जना घाइते भएका छन्। घाइतेमध्ये चारको अवस्था गम्भीर रहेको जनाइएको छ ।
इलाका प्रहरी कार्यालय तुलसीपुरका प्रमुख सुधीरराज शाहीका अनुसार सामान्य घाइतेको राप्ती अञ्चल अस्पतालमा उपचार भइरहेको छ भने गम्भीर घाइतेलाई नेपालगञ्ज रिफर गरिएको छ। विस्फोटमा घाइते हुनेमा दाङ तुलसीपुर ७ डाँडापातुका २२ वर्षीया जेनि डिसी, बबई गाउँपालिका ६ पंचकुलेका वर्ष ३६ का नेपबहादुर खत्री, उरहरीका २३ वर्षीय म्यादी प्रहरी विनोद चौधरी, सल्यान बागचौर नगरपालिका २ थारमारे बस्ने ४० वर्षीया देवी डिसीको अवस्था गम्भीर छ।
त्यसैगरी तुलसीपुर १९ का विनोद चौधरी, शान्तिनगर गाउँपालिका २ अम्मुवाका ५० वर्षीय हिमलाल रामजाली, बुड्कवाकी १८ वर्षीया सुनिता चौधरी, मानपुरका ४० वर्षीय बोमराज सुनार, सल्यान ढोरचौर गाउँपालिका २ चाख्लीघाटकी ४५ वर्षीया नरभूमि बुढाथोकी घाइते भएका छन्।
निर्वाचनको मिति नजिकिएसँगै केही सातादेखि बम विस्फोटका घटनाहरु बढाइएको छ । यसमा मुख्य गरेर नेत्रविक्रम चन्द विप्लव नेतृत्वको समूहको हात रहेको आशंका हुँदै आएको छ । यद्यपि उसले आफ्नो संलग्नताको पुष्टी भने गरेको छैन । प्रहरीले भने निर्वाचन विरोधी गतिविधि सञ्चालन गरिरहेको समूहबाट बम विस्फोट भएकोे आशंका गर्दै आएको छ ।
मोटरसाइकलमा आएको दुई जनाको समूहले बम विस्फोट गराएर भागेको थियो । उनीहरुको पहिचान भइसकेको जनाए पनि प्रहरीले पक्राउ भने गरिसकेको छैन । कांग्रेसको चुनावी सभालाई लक्षित गरेर तुलसी बोर्डिङ चौकमा गरिएको उक्त बम विस्फोटमा नौ जना घाइते भएका हुन ।
