काठमाडौँ: राजधानीमा गएराति र बुधबार बिहान भएको दुई छुट्टा-छुट्टै सडक दुर्घटनामा दुई जनाको मृत्यु भएको छ ।
प्रहरीका अनुसार लितपुर महानगरपालिका–१५ सातदोबाटो सडकमा नम्बर नखुलेको सवारी साधनले मंगलबार राती सप्तरी फत्तेपुर घर भई सातदोबाटो बस्ने ३५ वर्षीय पैदलयात्री सन्तोष चौधरीलाई ठक्कर दिँदा गम्भीर घाईते भएकाले उपचारको लागि पाटन अस्पताल लैजाने क्रममा बाटोमै मृत्यु भएको हो ।
घटनापछि शंकास्पद ना.५ ख ९७८० नम्बरको ट्रक र चालकलाई प्रहरीले नियन्त्रणमा लिएको जनाएको छ ।
त्यस्तै, भक्तपुरको मध्यपुरठिमी नगरपालिका–४ चारदोबाटोमा बा.२ क ८००६ नम्बरको ट्रकले बाटो क्रस गर्ने क्रममा सोही ठाउँ बस्ने ६६ वर्षीय जगतकुमार श्रेष्ठलाई बुधबार ठक्कर दिँदा गम्भीर घाइते भएकाले उपचारको लागि भक्तपुर अस्पताल लैजाने क्रममा बाटोमै मृत्यु भएको छ । ट्रक र चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको छ ।
