किङ्स कलेज र मिट भेन्चर्स, सिंगापुरबीच सहकार्य सम्झौता

काठमाडौं । व्यापार तथा व्यवस्थापन शिक्षामा परिचित किङ्स कलेज र सिंगापुरस्थित मिट भेन्चर्सबीच शुक्रबारदेखि सहकार्य सुरु भएको छ । उद्यमशिलताको क्षेत्रमा बृहत अनुभव एव स्रोतयुक्त यी दुई संस्थाहरुले उद्यमशिलता एवं नवप्रवर्तनको अवधारणालाई राष्ट्रिय मात्रै नभई क्षेत्रीयस्तरमै कार्यान्वयन तथा प्रबद्र्धन गर्ने उद्देश्यसहित सहकार्यसम्वन्धी सम्झौतामा हस्ताक्षर गरेका हुन् । 

किङ्स कलेजका प्रध्यानाध्यापक नरोत्तम अर्याल भन्छन्, ‘मिट भेन्चर्ससँग सहकार्य गर्न पाउँदा हामी निकै उत्साहित छौं । यस सम्झौताले नेपाली स्टार्टअप तथा अधिक संख्याका उद्यमीहरुलाई अन्तर्राष्ट्रिय मेन्टरबाट मेन्टरसिप हासिल गर्ने, अन्तर्राष्ट्रिय बजारको अन्वेषण गर्ने तथा अन्तर्राष्ट्रिय लगानीकर्ताहरुसँग गाँसिने अवसर प्रदान गर्नेछ भन्नेमा हामी विश्वस्त छौं ।’

यसैगरी, आज भएको सहकार्य सम्झौताअनुसार मिट मेन्चर्सले नेपाली तथा दक्षिण एसियाली स्टार्टअपहरुका लागि लगानी सहायता हासिल गर्ने अवसर प्रदान गर्ने कलेजको भनाई छ । यसका साथै नेपाली विद्यार्थीहरुले मिट मेन्चर्स तथा उसका सहायक कम्पनीहरुबाट उद्यमशिलताका परियोजनाहरुमाथि मेन्टरसिप हासिल गर्नुका साथै उनीहरुलाई सिंगापुर तथा दक्षिणपूर्बी एसियामा आयोजना हुने उद्यमशिलता तथा नवप्रवर्तनमा आधारित कार्यक्रम तथा प्रतिस्पर्धाहरुमा सहभागी हुन समेत अवसर प्राप्त गर्ने कलेजको भनाई छ । 

भेन्चर्सका फराह फिराडस भन्छन्, ‘नेपालसँग सम्झौता गरिएको यो नै हाम्रो पहिलो सहकार्य हो, उद्यमशिलताको विकास तथा प्रबद्र्धनको सवालमा हरेक मुलुकका आ–आफ्नै विशेष क्षमता हुन्छन् । आजको २१औं शताब्दीमा यस सुन्दर राष्ट्रबाट भोलीका दिनमा के–कस्ता उद्यमीहरु जन्मन्छन् भनेर हेर्न हामी निकै उत्साहित छांै ।’

एसिया क्षेत्रभित्र कार्य संचालन गरिरहेको मिट भेन्चर्स कर्पोरेट स्टार्टअफ इनोभेसन कम्पनी हो । कर्पोरेट क्षेत्रअन्तर्गतको नवप्रबद्र्धन र स्टार्टअपलाई सफलरुपमा स्थापित गर्न सघाउनु यसको मुख्य उद्देश्य रहेको छ ।