यो देश बिग्रिनुमा पहिलो दोषी ‘पोलिटिसियन’ हो, दोस्रोमा ‘ब्युरोक्रासी’: मन्त्री आले

काठमाडौं । संस्कृति, पर्यटन तथा नागरिक उड्डयन मन्त्री प्रेमबहादुर आलेले नेताहरुको कुदृष्टिको कारणले गर्दा देश बिग्रिएको बताएका छन् । 

शुक्रवार पर्यटन क्षेत्र पुनरुत्थान निर्देशक समितिको पहिलो बैठकमा उनले नेताहरुको कारण देश बिग्रिएको बताए । नेताहरुको चरित्र असल भएको भए देशको यो हालत नहुने थियो भन्दै आलेले नेताहरुको कुदृष्टिका कारण देश बिग्रिएको बताए । 

आलेले भने, ‘पशुपतिमा धर्मशाला बनिसकेपछि त्यसको टेन्डरप्रक्रिया पनि पशुपति क्षेत्र विकास कोषको मिटिङ बसेर मिटिङले पास गरेपछि मात्र टेन्डर गर्न पाउने कुरा हो । परिषद्को मिटिङबाट त्यो पास पनि भएको छैन् । हतार हतारमा टेन्डर निकालेर सेटिङमा त्यो पनि उनले लिनुभएछ । हेर्दाखेरी सबै प्रक्रिया गलत छ । उहाँ बतासकै पार्टनर रहेछन् डिमप्रसाद पौडेलजी । त्यही मान्छेलाई ल्याएर योगेश भट्टराईजीले के गर्नुभयो, निगमको एमडी बनाउनुभयो । बतासलाई यता धर्मशाला बुझाउनुभयो । यता ल्याएर निगमको एमडी बनाउनुभयो । बतास र धनन्जय रेग्मी पार्टनर । अनि उहाँलाई ल्याएर पर्यटन बोर्डको सीईओ बनाउनुभयो । कस्तो सेटिङ हेर्नुस् । अनि कसरी बन्छ त हाम्रो देश ?’

उनले थपे, ‘सबैभन्दा बढी यसको गल्ती भनेको म आफैँलाई भन्छु  नेताहरुले गर्दाखेरी हाम्रो देश बिग्रिएको । नेताहरुको चरित्र असल भएको भए यो नेपाल अहिले यो अवस्थामा हुन्थेन । जम्मै नेताहरुको कुदृष्टिको कारणले गर्दा भएको हो । यो देश बिग्रिने पहिलो कारण भनेको पोलिटिसिएन । सेकेण्ड चाहीँ ब्युरोक्र्याट पनि होलान् । तर सबभन्दा बढी दोषी भनेको पोलिटिसिएन हुन् ।’

आलेले मन्त्रीहरुले राजनीतिक नियुक्ति दिलाउनको लागि बार्गेनिङ गर्ने गरेको देखेको पनि बताए । मन्त्रीसँग आर्थिक बार्गेनिङ गरेर नियुक्त भएको मान्छेले काम नगर्ने र पैसा कमाउने मात्रै उद्दे्रश्य राख्ने पनि उनले उल्लेख गरे । उनले भने, – ‘हिच्किचाएर म भन्न चाहान्छु, मन्त्रीहरु कतिपय मैले के देखेको छु भन्दाखेरी कुनै राम्रो लाभको पदमा पठाउनुप¥यो भने पहिल्यै बार्गेनिङ हुँदोरैछ त्यहाँ । अनि बार्गेनिङ भइसकेपछि उसले किन काम गर्छ त ? उसको मुख्य लक्ष्य हुन्छ कसरी कमाउने ? किनकी उसले त बुझाएर आएको हुन्छ नि त । उसको इन्ट्रेष्ट त त्यो हुन्छ नि ।’

उनले सबै अप्ठ्यारो कानूनहरुलाई संशोधन गरेर पर्यटन क्षेत्रको प्रवद्र्धन गर्नुपर्ने बताए । सरकारले पर्यटकीय क्षेत्रको नयाँ गन्तव्य खोजी भइरहेको भन्दै आलेले सो गन्तव्यहरुको विश्वभर प्रचार प्रसार गरेर धेरै भन्दा धेरै पर्यटक भित्राउनुपर्नेमा जोड दिए ।