पञ्चायतकालका उद्योगधन्दाको विवरण हेर्दा महेन्द्र गज्जबका ‘भिजनरी’ राजा रहेछन्ः दाहाल

काठमाडौं । एक दशक लामो हिंसात्मक आन्दोलनबाट नेपाली राजनीतिमा उदाएका माओवादी केन्द्रका नेता पुष्पकमल दाहालले राजा महेन्द्रलाई ‘भिजनरी’को संज्ञा दिएका दिएका छन् । 

राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रसँगको भेटमा उनले आफू पहिलो पटक प्रधानमन्त्री हुँदाको प्रशंग कोट्याउँदै भनेका छन्, ‘पछिल्लो पटक प्रधानमन्त्री हुँदा नेपालका उद्योगधन्दाहरूको सबै विवरण मागेर हेरेको त पञ्चायतकालमा धेरै राम्रो काम भएको रहेछ । राजा महेन्द्र त गग्जबका ‘भिजनरी’ राजा रहेछन् ।’

हिंसात्मक द्धन्द्धको बेला आफ्ना केही साथी राजसंस्थाको विपक्षमा भए पनि आफू भने देशको हित हुन्छ भने राजासँग मिलेर जाउँ भन्ने पक्षमा रहेको उनले दावी गरेका छन् । दाहालको संकेत नेता बाबुराम भट्टराईतर्फ लक्षित थियो । 

२०६२–६३ को आन्दोलनताका राजा ज्ञानेन्द्र केही नरम भइदिएको भए आज परिस्थिति अर्कै हुनसक्थ्यो भन्दै नेता दाहालले देशमा विदेशी हस्तक्षेप चरम अवस्थामा पुगेको स्वीकार गरेका छन् । 

उनले राजसंस्थाको पक्षमा अहिले नै सहमत भइहाल्ने पक्षमा आफू नरहेको बताएका छन् । दाहाल भन्छन्, ‘म अहिले नै तपाइँको विचारसँग सहमत हुने स्थितिमा त पुगेको छैन । तर राती सुत्ने बेलामा सोच्न चाहिँ पर्ने अवस्था छ । ‘निरन्तरतामा क्रमभंगता’ अत्यावश्यक भइसक्यो ।

दाहालसँगको भेटमा आफूले भनेका कुराहरु उल्लेख गर्दै मिश्रले देश विस्फोटनको अवस्थामा पुगेको बताएका छन् । राजसंस्था पुनस्थापनामा उनले जोड दिएका छन् । मिश्रले भनेका छन्, ‘अब देश यस्तो विन्दूमा पुग्यो कि राजसंस्थालाई पुनर्स्थापित नगर्ने हो भने यो देश ुविस्फोटनको अवस्थाु तिर उन्मुख हुँदैछ। र त्यतिबेला तपाइँहरूको ‘अग्रगमन’, नाम र सालिक केही बाँकी रहने छैन । लामो व्याख्यासहित सारमा मैले यही भनेँ ।’

उनले थपेका छन्, ‘कौसीमा लामो संवाद गरेर तल ओर्लिंदा माओवादी पार्टीका दर्जनौँ साथीहरू प्रचण्डजीलाई पर्खेर बसिरहेका थिए । सतहमा उनीहरू आफ्नो नेता पर्खिरहेका थिए । तर गहिराइमा उनीहरू यो देश कहिले बन्ला र मेरा बालबच्चा–बाबुआमाले सुख पाउलान् भनेर पर्खिरहेका करोडौं नेपालीका प्रतिनिधि पात्र थिए । उनीहरूको जीवन पर्खिएरै बितिसकेको छ। बित्नेछ भन्नेमा संभवतः उनीहरू अनभिज्ञ थिए । म चाहिँ ‘ईश्वर नै स्वर्गबाट झरेर देश बनाइदिन्छु’ भने पनि वर्तमान प्रणालीमा यो देश बन्दैन र अझ बिग्रिन्छ भन्नेमा विश्वस्त छु ।