व्यवसायीको मन्त्रीलाई सुझाव– पर्यटन दशक घोषणा मात्रै गरेर हुन्न, बजेट पनि पर्याप्त छुट्टाउ

काठमाडौं । संस्कृति पर्यटन तथा नागरिक उड्डयन मन्त्री जीवनराम श्रेष्ठले नेपालको दीगो पर्यटन विकासको लागि सरकारले ‘पर्यटन दशक २०२३–२०३२’ को अवधारणा अगाडि ल्याएको बताएका छन् । 

पर्यटन दशकको अवधारणाका विषयमा नेपाल पर्यटन बोर्डको समन्वयमा आइतबार भएको कार्यक्रममा श्रेष्ठले पर्यटन नै नेपालको आर्थिक विकासको दीगो स्रोत भएको र कोभिड– १९ पछि थलिएको पर्यटनलाई पुनरुत्थान गर्न यो अवधारणा अघि सारिएको बताए । 

पर्यटन दशकको अवधारणा पत्र प्रस्तुत गर्दै मन्त्रालयका सचिव सुरेश अधिकारीले नेपालले दीगो रुपमा विदेशी मुद्राआर्जन गर्न सक्ने क्षेत्र पर्यटन भएकोले यसबाट लाभ लिन यो अवधारणा अगाडि बढाएको जनाए । उनले सन् २०३२ सम्म ३५ लाख पर्यटक ल्याउने लक्ष्य रहेको समेत बताए । 

पर्यटन बोर्डका कार्यकारी प्रमुख धनन्जय रेग्मीले कोभिड–१९ पछि पर्यटनमा थुप्रै समस्या देखिए पनि एक अर्कोसँग समन्वय गर्दै अगाडि बढ्न सके पर्यटनबाट नेपालले लाभ लिन सक्ने र यो अवधारणालाई समेत मूर्त रुप दिन सकिने बताए । 

पूर्व सभासद छायाँ शर्माले पर्यटनका विषयमा नीतिगत छलफल गर्न र यसलाई राज्यको प्राथमिकतामा पार्न पर्यटनसँग सम्बन्धित छुट्टै संसदीय समिति आवश्यक रहेको बताइन् । 

पर्यटन क्षेत्रका छाता संस्था, वरिष्ठ पर्यटन व्यवसायी तथा अन्य सरोकारवाला निकायको सहभागिता रहेको उक्त कार्यक्रममा बोल्दै निजी क्षेत्रका प्रतिनिधिहरुले पर्यटन दशकको अवधारणा सकारात्मक रहेको तर सफलताको लागि यसको कार्यान्वयन पक्षलाई थप प्रभावकारी बनाउनुपर्ने बताएका थिए । 

पूर्वपर्यटन राज्यमन्त्री याङकिला शेर्पा, पर्यटन व्यवसायी वसन्त मिश्रले पर्यटन दशक घोषणा मात्रै गरेर नहुने बताउँदै यसका लागि पर्याप्त बजेटको पनि सुनिश्चिचता हुनुपर्ने बताए । 

अर्का पर्यटन व्यवसायी योगेन्द्र शाक्यले पर्यटन दशक भन्दा पर्यटन विकासको लागि दशकको अवधारणा उपयुक्त हुने बताए । भ्रमण वर्ष छोटो समयको राख्दा उर्ययुक्त हुने उनको सुझाव थियो । 

होटल एशोसिएसन नेपाल (हान)की अध्यक्ष सिर्जना राणा र पर्यटन व्यवसायी विजय अमात्यले भ्रमण दशकको कार्ययोजना ल्याउन मन्त्रालयलाई सुझाव दिए । 

पर्यटन बोर्डका पूर्वकार्यकारी प्रमुख दीपकराज जोशीले दशक मनाउँदा हरेक वर्षलाई कुनै एक थिममा राखेर मनाउँदा उर्पयुक्त हुने सुझाव दिए । 

प्यासिफिक एशिया ट्रावल एशोसिएसन (पाटा) इन्टरनेशनलका सचिव तथा कोषाध्यक्ष सुमन पाण्डे, नेपाल पर्यटन बोर्डका पूर्व सदस्यद्वय दीपक महत र गणेश सिंखडा, नेपाल एशोसिएसन अफ टुर एण्ड ट्रावल एजेन्टस (नाटा)का अध्यक्ष रमेश थापा, निवर्तमान अध्यक्ष अच्युत गुरागाई ,नेपाल एशोसिएसन अफ राफ्टिङ एजेन्सिज (नारा)का अध्यक्ष शिव अधिकारी, टे«किङ एजेन्सिज एशोसिएसन अफ नेपाल (टान)का अध्यक्ष निलहरि बास्तोला, पर्यटन व्यवसायी विक्रम पाण्डे, अशोक पोखरेललगायतले पर्यटन दशकका रुपमा काम गर्दा सरकार र निजी क्षेत्रको भूमिकालाई स्पष्ट पार्दे ठोस कार्ययोजना ल्याउन सुझाव दिए ।