भैरहवाबाट उडान नगरेपछि नेपाल एयरलाइन्स र हिमालय एयरलाइन्सलाई प्राधिकरणको कारवाही

काठमाडौं । गौतमबुद्ध अन्तर्राष्ट्रिय विमानस्थलमा उडान भर्ने गरी तालिका नबनाएका कारण नेपाल नागरिक उड्डयन प्राधिकरणले नेपाल एयरलाइन्स र हिमालय एयरलाइन्सलाई कारवाही गरेको छ । 

प्राधिकरणले उनीहरुको त्रिभुवन विमानस्थलबाट गर्ने नियमित उडानहरू कटौती गरिदिएर कारवाही गरेको हो । प्राधिकरणका प्रवक्ता जगन्नाथ निरौलाले प्राधिकरणबाट स्वीकृत तालिकाअनुसार उडान नराखेको र त्यो भन्दा बढी उडान राखेका कारण नेपाल एयरलाइन्स र हिमालयन एयरलाइन्सको उडानहरू कटौती गरेको बताए । 

निरौलाले भने, ‘जानकारी भइसकेपछि आज उडान राख्नु हुँदैन् थियो । हिमालय एयरलाइन्सले आज काठमाडौंबाट उडान तालिका राखेको थिएन् । त्यसलाई समस्या भएन । उडानको लागि जति स्वीकृत पायो त्यति मात्र उडान भरिरहेको छ । तर भैरहवाबाट उसले उडान राखेन् । नेपाल एयरलाइन्सले स्वीकृत भएको भन्दा बढी काठमाडौंबाट उडान राखेका कारण यस्तो कारवाही गर्नुपरेको हो ।’

प्राधिकरणले नेपाली अन्तर्राष्ट्रिय वायुसेवा कम्पनीहरुलाई विन्टर सिजनको तालिकामा भैरहवाबाट पनि उडान गर्न भनेको थियो । त्रिभुवन विमानस्थलमा हवाई ट्राफिक कम गर्न दैनिक तीनभन्दा बढी अन्तर्राष्ट्रिय उडान गर्ने कम्पनीले कम्तीमा एउटा उडान भैरहवा विमानस्थलबाट गर्नुपर्ने नियम बनाएको थियो । 

आइतबारदेखि हिमालय र नेपाल वायुसेवा निगमले त्रिुभवन विमानस्थलबाट गर्ने दुई–दुई वटा उडान भैरहवामा सार्नुपर्ने थियो । नोभेम्बरबाट अप्रिल महिनाको अन्तिम तिर विन्टर तालिका हुन्छ ।प्राधिकरणका अनुसार ३० अक्टोबर २०२२ (आज) देखि २५ मार्च २०२३ सम्म ६ महिनाको ‘विन्टर सिजन’को उडान तालिका तय हुन्छ । 

सो तालिकाअनुसार उडान गर्नेगरी योजना बनाउन कम्पनीहरुलाई भनिएको तर उनीहरुले अटेरी गरेका उडान रोकिएको प्राधिकरणको भनाई छ । विन्टर तालिका स्वीकृत गर्दा अहिले बढी उडानहरु काठमाडौंबाट गर्ने एयरलाइन्सहरुलाई डिसेम्बर १५ तारिखसम्म गौतम बुद्ध अन्तर्राष्ट्रिय विमानस्थलबाट उडान भर्न लगाउने भनेर गरिएको प्राधिकरणले जनाएको छ । 

प्राधिकरणका सुचना अधिकारी ज्ञानेन्द्र भुलले भैरहवा विमानस्थल सञ्चालनमा आएदेखि नै उक्त विमानस्थलबाट उडान गर्ने योजना बनाउन आफूहरुले नेपाल एयरलाइन्स र हिमालय एयरलाइन्सलाई आग्रह गरेको बताउँदै उनीहरुले गर्छु गर्छु भनेर पनि नटेर गरेको बताए । 

नेपाली एयरलाइन्सले भैरहवाबाट उडान नगर्ने हो भने विदेशी एयरलाइन्सलाई गर्नु भन्न आफूहरुलाई असहज हुने उनको भनाई छ । भुलले एक हप्ताअघि नै दुवै एयरलाइन्सलाई उडान तालिका पेश गर्न आग्रह गर्दा उनीहरुले विभिन्न बहाना बनाएर समय दिन आग्रह गर्दै आएको बताए । त्रिभुवन विमानस्थलमा धानवमार्ग र ट्याक्सवे सुधारको तालिकाको समय पनि आउन लागेकाले रात्रिकालिन उडानका अनुमति दिन पनि सक्ने अवस्था नरहेको कुरालाई मध्यनजर गरेर भैरहवाबाट उडान राख्न आग्रह गरिएको उनले बताए । 

भुलले उडान कटौती नभई ट्राजिट उडान गर्न मात्रै भनेको बताए । त्रिभुवन विमानस्थलमा मात्रै ट्राफिक बढाएर भैरहवा खाली गर्न नमिल्ने उनको भनाई छ । भुलले दैनिक तीन वटाभन्दा धेरै उडान गर्ने विदेशी एयरलाइन्सले पनि आउँदो पुस १ गतेबाट भैरहवामा पनि उडान गर्नुपर्ने बताए । उनीहरुलाई ४५ दिनको समय दिएर सुचित गरिसकेको उनले बताए ।