‘चुनावमा पर्यटक आउन मान्दैनन्, किनभने दक्षिण एसियामा चुनाव शान्तिपूर्ण हुन्न भन्ने छाप छ’

काठमाडौं । होटल संघ नेपाल (हान) का उपाध्यक्ष विनायक साहले चुनावका कारण पार्टीका नेता कार्यकर्ताले केही होटल भरिए पनि पर्यटकीय समयमा विदेशी तथा आन्तरिक पर्यटकका कारण होटलको अकुपेन्सी बढ्न नसकेको बताएका छन् । 

कर्पोरेट नेपालसँगको कुराकानीमा उनले यो समय पर्यटकीय सिजन भए पनि आन्तरिक र भारतीय पर्यटकहरुको संख्या बढेको तर अमेरिकन, यूरोपियन, जापानी पर्यटकहरुको संख्या निकै कम रहेको बताए । ​साहले भने, ‘अहिले पर्यटकीय सिर्जन हो । टे्रकिङ र हिमाल आरोहण गर्न पर्यटकहरु आउनुपर्ने सिर्जन हो । तर खासै आएका छैनन् । कारण के हो ? भन्दा दक्षिण एसियामा चुनाव हुँदा शान्तिपूर्ण हुँर्दैन भने उनीहरुमा छाप परेको छ ।’

चुनावको समयमा पार्टीका नेता कार्यकर्तादेखि सरकारी कर्मचारी यताउता गर्ने भएकाले आन्तरिक पर्यटकीय गतिविधि भएको देखिए पनि यसले समग्र होटल उद्योगलाई फाइदा नगर्ने उनले बताए । साहले केही होटल त्यस्ता पार्टीका कार्यकर्ता र कर्मचारीले भरिँदैमा त्यसलाई राम्रो भन्न नसकिने बताए । 

उनले होटल ४० प्रतिशत नभरिएसम्म घाटामा सञ्चालन भइरहेको हुने बताए । पार्टीका नेता कार्यकर्ता बस्दा होटलहरुलाई फाइदा नै हुन्छ भन्न नसकिने बताउँदै साहले चुनावमा विदेशी पर्यटक नै कम आउने हुँदा त्यसले बढी नोक्सान गर्ने बताए । 

अहिले प्रि–बुकिङ राम्रै भए पनि कोरोना महामारीअघि संसारभर जुन ढंगले पर्यटक भ्रमण गर्थे, त्यस्तो अहिले नरहेको उनले बताए । साहले भने, ‘त्यो बेला लाखौंको संख्यामा आउँथे पर्यटकहरु नेपालमा । कोरोनापछि हजारमा आउँछन् । सबै देशलाई अप्ठ्यारो परेको छ । देशहरु आर्थिकरुपमा सबल छैनन् । युक्रेन–रुसको युद्धले पनि भ्रमण एक्दम महँगो भएको छ । हवाई खर्च महँगो भएको छ । सो कारण पर्यटक आगमन कम नै छ ।’ 

यस समस्याको समाधान सरकारले खोज्नुपर्ने उनको भनाई छ । साहले भने, ‘समस्या समाधान भनेको नेपालले कस्तो प्याकेज दिइरहेको छ विदेशी पर्यटक भित्राउन ? त्यो महत्वपूर्ण हुन्छ । जसरी थाइल्याण्ड, मलेशिया, दुबई, मालदिभ्सले प्याकेजहरु ल्याएर अहिले पर्यटक भित्राइरहेका छन् । नेपालले भने केही नगरेको उनको गुनासो छ । 

साहले सरकार अहिले चुनावबाहेक बाहिर छैन् भन्दै हचुवाको भरमा पर्यटन दशक घोषणा गरेको बताए । उनले भने, सरकारले २०२३–२०३३ लाई पर्यटन दर्शक भनेको छ । दशक भनेको के हो ? त्यसमा के कस्तो कार्यक्रम हुन्छ ? केही छैन् । पर्यटन मन्त्रालयले ७३ बुँदे कार्यक्रम घौषणा त गर्यो ।  त्यो लागू भएको छैन् ।

साहले अहिले नेपाल गन्तव्य पदोन्नती गर्ने बेला हो भन्दै गन्तव्य पदोन्नती गरे बाहिर घुम्न निस्किन खोज्ने पर्यटकलाई नेपालमा आकर्षित गर्न सकिने बताए । नेपाल टे«किङ र हिमाल आरोहणको लागि विश्वको उत्कृष्ट गन्तव्य भएको उनले बताए । ‘नेपाललाई माया गर्ने मानिस धेरै छन् विश्वमा । उनीहरुलाई नेपाल ल्याउन सकाका छैनौं’ साहले भने । 

भारतीय पर्यटक नेपाल आउन रुचाउने गरेको सुनाउँदै उनले तर अहिले सरकारको तर्फबाट नेपाल पर्यटन बोर्डले भारतमा गएर आधिकारिक रुपमा नेपाल सामान्य भयो भनेर भन्न नसकेको बताए । साहले थपे, ‘त्यसैले गन्तव्य पदोन्नती गर्यो भने आजको भन्दा धेरै पर्यटकहरु नेपाल आउँछन् । भारतीय पर्यटकहरु पहिला धेरै जसो थाइल्याण्ड, सिंगापुर, यूरोप घुम्न जान्थे । तर कोरोनापछि त्यो संख्या निकै घटेको छ । नेपाल त्यसको लागि विकल्प हुनसक्छ ।’