शान्ता दिदीले बनाएको अचार नखाने ?

काठमाडौं । महिला उद्यमी शान्ता केसी विगत आठ वर्षदेखि अचार उत्पादनका क्षेत्रमा सक्रिय छन् । उनको स्वादिष्ट अचार स्वेदशमा मात्रै नभएर विदेशमा समेत पुग्ने गरेको छ । 

केसीले ‘शान्ता दिदीको अचार’ नाम दिएर आफ्नो उत्पादनको ब्राण्डिङ गर्दै आएकी छन् । पाँच लाख रुपियाँ लगानी गरेर अचार उद्योग सुरु गरेकी उनले मासिक कम्तिमा ४० देखि ५० हजार रुपियाँ आम्दानी गर्छिन् । ‘खाली समयमा यसै बस्नुभन्दा केही गरौं भनेर अचार बनाउन सुरु गरेकी हुँ’, केसी भन्छिन्, ‘एक महिनामा दुई सयदेखि तीन सय सीसीसम्म अचार बिक्री गर्छु ।’

शान्ता केसीले आठ बर्षअघि अचार उद्योग सञ्चालन गर्नुअघि १० दिने तालिम लिइन् । सोही तालिमबाट पाएको ज्ञान र सीपको आधारमा उनी अहिले अचार उत्पादनका क्षेत्रमा पोख्त र अनुभवी बनेकी छन् । त्यति मात्रै होइन्, अहिले केसी विभिन्न पालिका र वडाहरुमा गएर अरु महिलाहरुलाई पनि अचार बनाउने सीपमूलक तालिम दिने गर्छिन् । ‘यसरी तालिम दिँदा अरुले ज्ञान पनि पाउँछन्, मलाई पाँच हजार भत्ता पनि दिन्छन्’, उनी सुनाउँछिन् । 

पछिल्लो समयमा घरायसी उद्योगबाट उत्पादित अचार लोकप्रिय बन्ने गरेको छ । मानिसहरु पेशा, व्यवसाय र जागिरमा बढी व्यस्त हुने क्रम बढेकाले घरमा उनीहरु आफै बचारहरु बनाउन भ्याउँदैनन् । शुद्ध बस्तुहरु प्रयोग गरेर सफा तरिकाले बनाएका अचारहरुले विशेषगरी शहरी क्षेत्रमा बजार पाउने गरेको छ । विदेशमा बस्नेहरुले पनि नेपालबाट अचार मगाएर लैजाने क्रम बढेको बताउँदै अचार उद्यमी केसीले आफूले बनाएरको अचार बेलायत, अमेरिका, जापानसम्म पुग्ने गरेको बताइन् । 

राजधानीको टोखा, धापासीस्थित आफ्नो घरमा अकबरे खुर्सानी, मुला, कागती, अमला, मासु लगायत चिजहरुको अचार बनाउँदै आएकी उनले आफ्नो उत्पादन लोकप्रिय हुँदै जानुमा स्वस्थकर मात्रै नभएर सस्तो र फरक स्वाद पनि भएको दावी गरिन् । 

केसी भन्छिन्, ‘म अचारमा कुनै रसायन र रंग प्रयोग गर्दिन् । घरायसी मरमसला पनि छुट्टै प्रयोग गर्ने गरेको छु ।’ उमारेको मेथी, लसुन, तिते करेलाको अचारमा चिल्लो, पिरो र नुनको मात्रा कम राख्ने हुँदा सुगर र प्रेसरका बिरामीको लागि पनि यो उपयुक्त हुने उनको तर्क छ । केसीले उत्पादन गरेका अचारहरु खुद्रा पसल र ठूलो मार्टहरुमा मात्रै नभएर घरबाटै समेत बिक्री हुने गरेको छ ।