आइतबार २ मंसिर, २०८१ | Sunday Nov 17, 2024
आइतबार २ मंसिर, २०८१ | Sunday Nov 17, 2024
काठमाडौं । उद्योग, वाणिज्य तथा आपूर्ति मन्त्री रमेश रिजालले काठमाडौंको भृकुटीमण्डपमा जारी ‘वृहत जुत्ता चप्पल व्यापार मेला’को अवलोकन गरेका छन् ।
उनले आइतबार मेलास्थलमा पुगेर जुत्ता चप्पलका सबै स्टलहरुको अवलोकन गरेका हुन् । जुत्ता चप्पलका स्वदेशी उद्योग तथा उत्पादनलाई प्राथमिकता राखेर र प्रवर्द्धन गर्नुपर्ने मान्यतासहित मन्त्री रिजालले मेलाको अवलोकन गरेका हुन् ।
मेलाको अवलोकन गर्ने क्रममा मन्त्री रिजालले ३ जोर जुत्ता चप्पलसमेत खरिद गरे । मन्त्रीले मेलामा उपस्थित भएर स्वदेशी ब्राण्डप्रति चासो देखाउनु सकारात्मक कदम भएको आयोजक सबिन कार्की बताउँछन् । ‘मन्त्रीले चासोका साथ मेलाको अवलोकन गर्नुभयो,’ उनले भने, ‘स्वदेशी उद्योग र स्वदेशी ब्राण्डलाई अब सरकारले प्राथमिकतामा राख्नुपर्छ ।’
मन्त्री रिजालले मेलाको अवलोकन गरेपनि जुत्ता नै खरिद गर्छन् भन्ने आयोजकलाई लागेको थिएन । मन्त्री रिजालले आफ्नो लागि ३ जोर जुत्ता खरिद गरेपछि आयोजक उत्साही भएका थिए ।
विशेष छुटसहित सस्तो मूल्यमा जुत्ता चप्पल खरिदको अवसर मिलेसँगै मेलामा जुत्ता चप्पल खरिद गर्नेहरुको आकर्षण देखिएको आयोजकको भनाइ छ ।
यस अगाडि नेकपा एमालेका अध्यक्ष एवं पूर्व प्रधानमन्त्री केपी शर्मा ओली, नेपाली काँग्रेसका महामन्त्री गगन थापा र विश्वप्रकाश शर्मा, काँग्रेस नेता प्रदिप पौडेल, व्यवसायी दुर्गा प्रसाईं लगायतले मेलाको अवलोकन गरिसकेका छन् ।
