पहिलो पटक यौनिक अल्पसंख्यक २४ जनाले लिए ‘ट्रेकिङ गाइड’ तालिम

काठमाडौं । नेपालमा पहिलो पटक यौनिक तथा लैङ्गिक अल्पसंख्यकलाई ट्रेकिङ गाइड तालिम दिइएको छ । नेपाल माउन्टेन एकेडेमी, सस्टेनेबल टुरिजम फर लायभलिहुड रिकभरी प्रोजेक्ट र ब्लु डायमण्ड सोसाइटीको सहकार्यमा तालिम सञ्चालन गरिएको हो । 

नेपाल पर्यटन बोर्डका निर्देशक मणिराज लामिछाने उनीहरुलाई ३५ दिने ट्रेकिङ गाइड तालिम दिएको बताए । तालिम २४ जना यौनिक अल्पसंख्यक सहभागी थिए । उनीहरुले तालिम लिएर परीक्षा पनि दिइसकेको उनले बताए । 

नेपालमा पदयात्राका लागि आउने कतिपय पर्यटकहरुले यौनिक अल्पसंख्यक गाइडहरुको बारेमा चासो राख्ने गरेको पर्यटन व्यवसायीहरु बताउँछन् । सोही समुदायका पर्यटकहरुले आफ्नै समुदायका ट्रेकिङ गाइड खोज्ने गर्दछन् । यस तालिमबाट यौनिक अल्पसंख्यक पर्यटक बढाउन सहयोग पुग्ने लामिछानेको विश्वास छ । 

विश्वको कुल जनसंख्याको दुई प्रतिशत यौनिक अल्पसंख्यक रहेको बताइन्छ । अन्तर्राष्ट्रिय बजारमा नेपालमा यौनिक अल्पसंख्यक ट्रेकिङ गाइड छन् भन्ने सन्देश दिन सके ५–६ लाख पर्यटक सो सामुदायबाट नेपाल ल्याउन सकिने र नेपालको पर्यटन क्षेत्रलाई माथि पुर्याउन सकिने लामिछानेको जिकिर छ । 

तालिम लिएकाहरु सबैले ट्रेकिङ गाइडको काम गर्ने इच्छा राखेको र केहीले यौनिक अल्पसंख्यक समुदायलाई केन्द्रीत गरी टे«किङ कम्पनी सञ्चालन गर्ने योजना समेत बनाएको उनले जानकारी दिए । 

उनीहरुलाई दिएको ३५ दिनको तालिममा सैद्धान्तिक र व्यवहारिक गरी दुई प्रकारले प्रशिक्षित गरेको, जसमा चार दिनको व्यवहारिक सिकाईमध्ये तीन दिन ककनीमा र एक दिन ठमेलमा तालिम दिइएको थियो । उनीहरुलाई दिएको तालिम सार्थक भयो भने अरुलाई पनि खुलेर बाहिर आउन मद्दत पुग्ने लामिछानेको विश्वास छ । 

तालिममा सहभागीमध्ये परीक्षामा पास हुनेहरुले प्रमाण–पत्र पाउनुका साथै उपत्यका पर्यटन कार्यालयबाट इजाजतपत्र पाउने छन् । त्यसपछि उनीहरु आधिकारिक रूपमा ट्रेकिङ गाइड भएर काम गर्न सक्नेछन् । 

ब्लू डायमण्ड सोसाइटीका कार्यक्रम व्यवस्थापक परशुराम चौधरीले आगामी दिनमा पनि यस्ता तालिमहरु आफूहरुले अपेक्षा गरेको बताए । उनले भने, ‘हामीलाई यस्तो किसिमको तालिम चाहिन्छ । किनभने हाम्रो सामुदायका कोही कुनै ठाउँमा जागिरको लागि जाँदाखेरी जागिर नपाउने, जागिर पाइहाल्यो भने पनि विभिन्न किसिमका भेदभाव हुने, लान्छना लगाउने, एक्लो बनाइदिने, मिल्न नचाहाने जस्ता समस्या झेल्नुपर्छ । यस्ता कुराहरुले गर्दा हामी अवसरबाट बन्चित हुन्छौं । त्यस्तो अवसरबाट बन्चित रहेका हाम्रा साथीहरुलाई व्यवहारिक र ज्ञानमूलक तालिमको एक्दमै आवश्यकता छ ।’ 

तालिममा सहभागीहरुले आगामी दिनमा अझ उन्न्नत तालिम र विभिन्न देशका भाषा सिक्ने इच्छा पनि राखेको आयोजकको भनाई छ । तालिम बैशाख २३ देखि जेठ २६ सम्म सञ्चालन भएको थियो ।