बैंकमा पाँच खर्ब पैसा छ, तर राष्ट्र बैंकको नीतिले लगानी हुन सकेन्ः ढकाल, कार्यकारीलाई असीमित अधिकार दिनहुन्नः हमाल
बुधबार २१ कात्तिक, २०८१ | Wednesday Nov 06, 2024
बैंकमा पाँच खर्ब पैसा छ, तर राष्ट्र बैंकको नीतिले लगानी हुन सकेन्ः ढकाल, कार्यकारीलाई असीमित अधिकार दिनहुन्नः हमाल
काठमाडौं । नेपाल उद्योग वाणिज्य महासंघ र नेपाल धितोपत्र बोर्ड (सेबोन)बीच देशभर पुँजीबजारसम्बन्धी शिक्षा तथा सचेतना वृद्धि गर्ने गरी समझदारी पत्रमा हस्ताक्षर भएको छ । बिहीबार महासंघ र बोर्डबीच यस्तो समझदारी भएको हो ।
सम्झौता पत्रमा महासंघका अध्यक्ष चन्द्र ढकाल र धितोपत्र बोर्डका अध्यक्ष रमेश हमालले हस्ताक्षर गरेका थिए । सम्झौता अनुसार बोर्डले महासंघको सहकार्यमा देशभर शेयर बजारसम्बन्धी सचेतना फैलाउने र शिक्षा प्रदान गर्नेछ ।
महासंघका अध्यक्ष ढकालले राष्ट्र बैंक, धितोपत्र बोर्ड र बीमा प्राधिकरण जस्ता नियमनकारी निकायहरुले बजारमा सकारात्मक सन्देश दिन जरुरी रहेको बताए । उनले अहिले बैंकहरुमा पाँच खर्ब पैसा रहेता पनि नियमनकारी निकायहरुको नीतिको कारण लगानी हुन नसकेको बताए । ढकालले अर्थतन्त्रमा समस्या आउनु शेयर बजारमा कारोबार गर्ने व्यक्ति तथा संस्थाहरुलाई दोष लगाउन नमिल्ने बताए ।
उनले पूजीबजारमा समस्या आउनु नियमनकारी निकाय र सरकारको नीति भएको बताए । ढकालले अहिलको पुँजीबजारको समस्या समाधानको लागि नियमनकारी निकाय, सरकार र लगानीकर्ताहरुको सहकार्य आवश्यक रहेको बताए ।
धितोपत्र बार्डका अध्यक्ष रमेश हमालले नेपालमा विकास र समृद्धि चाहने हो भने कार्यकारी प्रमुखलाई असिमित अधिकार दिन नहुने बताए । उनले अधिकारभन्दा पनि पद्धतिले चल्नुपर्ने उनले बताए । हमालले कसैलाई पनि शेयर बजारमा समावेश भएको कम्पनीको शेयर बन्द गर्ने र खोल्ने अधिकार हुन नहुने बताए ।
हमालले त्यति धेरै अधिकार दिएर अध्यक्ष बनाइयो भने संस्था ध्वस्त हुने बताए । उनले अहिलेसम्म विश्व प्रणालीमा आधारित भएर चलेको बताए । हमालले नेपाल भन्दा साना मुलुकहरु धेरै माथि रहेको बताए । हमालले धेरै सम्भावना भएको मुलुक नेपालमा अबको २३ वर्षमा पनि विकास गर्न सकेनौं भने कहिल्यै केही गर्न नसक्ने बताए । हमालले महासंघसँगको सहकार्य क्षणिक नभएर दीर्घकालिन रुपमा लैजाने बताए ।
