होक्काइडोको स्वादले लोकप्रिय बनेको होक्काइडो रेष्टुरेन्टहरु

काठमाडौं । अर्जुन अधिकारी जापानको होक्काइडो भन्ने ठाउँमा रेष्टुरेन्ट व्यवसायमा जमेका व्यक्ति हुन । सो ठाउँमा झण्डै दुई दर्जन स्थानमा रेष्टुरेन्ट खोल्न सफल भएपछि उनलाई नेपालमा जापानी ब्राण्डमा रेष्टुरेन्ट खोलेर व्यापार गर्ने रहर जाग्यो । 

सन् २००१ देखि जापानमा बस्दै आएका अधिकारीले एकै सोच भएका छ जना साथीहरुको समूह बनाए र त्यसको नाम दिए होक्काइडो नेपाल बिजनेस ग्रुप । सोही नामको कम्पनीका अध्यक्ष हुन अर्जुन अधिकारी । विभिन्न क्षेत्रका मानिसहरु रहेको उनको समूहले ‘होक्काइडो’ नाममा सात वटा रेष्टुरेन्टहरुको चेन बनाइसकेको छ । त्यसको पहिलो सुरुवात ‘होक्काइडो रामेन हाउस’ थियो जसको सुरुवात २०७४ सालमा बुढानीलकण्ठस्थित पार्क भिलेज रिसोर्ट अगाडिबाट भएको थियो । 

उनका अनुसार रामेनपछि दोस्रोमा बालुवाटारमा डेक्काइडो फार्म हाउस, बालुवटारकै बगैंचा रेस्टुरेन्टभित्र ओमाकासे रेस्टुरेन्ट, लाजिम्पाटको र्याडिसन होटल नजिक इजाकाया होक्काइडो, बौद्धमा होक्काइडो बेन्टो हाउस, सानेपामा इन्टरनेशनल क्लब र लाजिम्पाटमै लि शेर्पा सञ्चालनमा ल्याइएको छ । 

पढाइको सिलसिलामा २००८ मा अष्ट्रेलिया पुगेका शर्मा अधिकारीसँगको सहकार्यमा रेष्टुरेन्ट सुरु गरेका हुन् । सुरुमा सरसफाइ क्षेत्रमा लागेका उनले अष्ट्रेलियामा १२ वर्षदेखि विभिन्न व्यवसाय सञ्चालन गर्दै आएका छन् । सरसफाई व्यवसायपछि शर्मा अहिले नेपालीलाई जापानको अर्गानिक स्वादका खाना खुवाउन सक्रिय छन् । 

उनले भने, ‘रेस्टुरेन्ट व्यवसाय मेरो लाइनको थिएन । पहिला म सरसफाइ लाइनको मान्छे । तर रेस्टुरेन्टमा सरसफाइ एक्दम चाहिने हुँदा हस्पिटालिटि क्षेत्र सरसफाइसँग नजिकको व्यवसाय हो । म पनि अहिले यसमा आइपुगे ।’

होक्काइडो रेष्टुरेन्टका शाखाहरुमा अहिले १७० जना मानिस कार्यरत छन् । शर्माको डेक्काइडो फार्म हाउसमा सिटिङ क्षमता २१२ जनाको रहेको छ भने शनिबार बढी भीड हुन्छ । उक्त दिन क्षमताभन्दा बढी साढे चार सयदेखि साढे पाँच सयलाई सेवा दिनुपर्ने बाध्यता रहेको उनले सुनाए । 

शर्माले भने, ‘नेपालमा जापनिज खानाको कल्चर बढेको छ । धेरैले चासो दिने गरेको गुगल रिभ्युबाट पनि देखिन्छ ।’ जापानी खाना स्वस्थकर हुने भन्दै शर्माले विशिष्ट व्यक्तिहरुले समेत आफूहरुको रेष्टुरेन्टमा आउने गरेको बताए । धेरै पाउनाले बस्न रुम र कार्यक्रम गर्न हल पनि खोज्ने गरेको सुनाउँदै उनले निकट भविष्यमा १० वटा जति रुम निर्माण गर्ने र हल पनि बनाउने योजना रहेको बताए । 

आफूहरुले जापानीबाहेक नेपाली र इटालियन परिकार पनि बनाउने शर्माले सुनाए । उनले निकट भविष्यमा पाँचदेखि छ देशका खानाहरु उपलव्ध गराउने बताए । शर्माले भने, ‘कुनै पनि कामप्रति लगाव र अनुशासन भए नेपालमा ठूलो अवसर छ । अहिले विदेशमा गएकाहरुले पनि विदेशमा भन्दा नेपालमा फर्किएर झन राम्रो गर्न सक्छन् । त्यो वातावरण बन्दै गएको छ ।’