ठूला दलसम्मिलित दुईतिहाईको सरकार बनेपछि झन घट्यो घरजग्गा कारोबार

काठमाडौं । चालु आर्थिक बर्ष २०८१–८२ को भदौ महिनामा मात्रै घरजग्गाको कारोबार ८.०९ प्रतिशतले घटेको छ । भूमि व्यवस्थापन तथा अभिलेख बिभागबाट प्राप्त तथ्यांकले घरजग्गाको कारोबारमा झन शिथिलता आएको देखाएको हो । 

ठूला दलसम्मिलत दुईतिहाई बहुमतको सरकार बनेपछि राजनीतिक स्थिरता कायम भई आर्थिक गतिविधिमा सुधार आउने सरकारी पक्षले दावी गर्दै आए पनि पछिल्लो समयमा शेयर बजारदेखि घरजग्गा कारोबारमा गिरावट आउन थालेको छ । 

यद्यपि, गत साउनमा भने घरजग्गा कारोबार ११।६४ प्रतिशतले बढेको थियो । गत आवको साउनमा देशभर ३९ हजार २६३ वटा घरजग्गाको कारोबार भएको थियो । चालु आवको साउनमा भने ४३ हजार ८३५ वटा यस्ता कारोबार भएका थिए । तर, भदौमा भने घरजग्गा कारोबारमा कमी आएको तथ्यांकले पुष्टी गरेको छ । 

साउन र भदौंमा गरेर देशभर ७६ हजार ६३३ वटा घरजग्गाका कारोबार भएका छन् । यो गत आवको सोही अवधीको तुलनामा ३।५५ प्रतिशतले बढी हो । गत आवको दुई महिनामा देशभर ७४ हजार ९४९ वटा घरजग्गाको कारोबार भएको थियो । गत आवभरमा भने पाँच लाख ३७ हजार २९५ वटा घरजग्गाको कारोबार भएको थियो ।

तथ्यांकअनुसार भदौमा सुनसरीको इनरुवा मालपोत कार्यालयबाट सबै भन्दा धेरै कारोबार भएको छ । भदौ महिनामा त्यहाँबाट १६ सय ५१ वटा घरजग्गाको लिखित पारित भएको छ ।

दोस्रो स्थानमा भने झापाको भ्रदपुरको मालपोत कार्यालय रहेको छ, त्यहाँबाट १२ सय ६५ वटा घरजग्गा कारोबार भएको छ । तेस्रो स्थानमा भने धनुषाको जनपुरधामको मालपोत कार्यालय रहेको छ, त्यहाँबाट ११ सय ४८ वटा घरजग्गाको कारोबार भएको छ । 

काठमाडौं उपत्यकामा कति ?
समीक्षा महिनामा काठमाडौं उपत्यकामा तीन हजार ६२३ वटा घरजग्गा खरिद बिक्री भएको छ । त्यसमा ललितपुरको लगनखेल मालपोत कार्यालयबाट ७६२ र गोटीखेल मालपोत कार्यालयबाट नौ वटा घरजग्गा कारोबार भएको छ । यस्तै, भक्तपुर मालपोत कार्यालयबाट ७९६ वटा घरजग्गा कारोबार भएको देखिन्छ । 

यस्तै, काठमाडौंमा डिल्लीबजार मालपोत कार्यालयबाट १७९, चावहिल मालपोत कार्यालयबाट ४६४, कलंकी मालपोत कार्यालयबाट ६८६, मनमैजु मालपोत कार्यालयबाट २१७, साँखु मालपोत कार्यालयबाट ३८१ र टोखा मालपोत कार्यालयबाट १२९ वटा घरजग्गाका कारोबार भएका छन् ।