ट्राफिक प्रहरीसँग प्याड छाप्न पनि पैसा छैन.....!?

काठमाडौं । कानुन कार्यान्वयन गर्ने प्रहरीलाई कानुन उल्लङ्घन गर्नेमाथि जरिवाना तिराउनका लागि प्याड छाप्न आर्थिक अभाव होला ? नहोला । 

अहिले महानगरीय प्रहरी परिसर कार्यालय काठमाडौँलाई भने सार्वजनिकस्थलमा सुर्तीजन्य पदार्थ सेवन गर्नेमाथि जरिवाना तिराउन प्रयोग हुने प्याड छपाउन अर्थ अभाव देखिएको छ । “खोजखाज र तानतुन गरी केही प्याड छपाइ गरेयौँ, अब केही बाँकी होला, थप छपाउन पैसा छैन” परिसरका प्रहरी वरिष्ठ उपरीक्षक विक्रमसिंह थापाले भने । 

पाँच महिनाका अवधिमा सोबापत परिसरले सात लाख रुपियाँ जरिवाना  सङ्कलन गरेको छ । सार्वजनिकस्थलमा विशेष गरी धूमपान गर्नेलाई प्रहरीले नियन्त्रणमा लिई एकसय जरिवाना तिराउँदै छाड्ने गरेको छ । यसका लागि परिसरले हाल दैनिक ४० टोली परिचालन गरिरहेको छ । 

टोलीले सुर्तीजन्य पदार्थका कारण हुने अर्बुद रोगका बारेमा प्रारम्भिक परामर्श दिइरहेको र सरकारी तथा निजी विद्यालयमा अध्ययनरत छात्रछात्रालाई अनुशिक्षण कार्यक्रम सञ्चालन गरिरहेको छ । “हाम्रो अभियानको उद्देश्य भनेको कलम, कापी र किताब बोक्ने युवाले औँलामा चुरोटको खिल्ली नसमातून् भन्ने नै हो, यसका लागि प्रहरी सचेतपूर्वक काममा जुटिरहेको छ”, थापाले भने । 

कार्यक्रममा महानगरीय प्रहरी आयुक्तको कार्यालयका प्रमुख प्रहरी अतिरिक्त महानिरीक्षक प्रतापसिंह थापाले सार्वजनिकस्थलमा सूर्तीजन्य पदार्थ सेवन गर्नेलाई जरिवाना तिराउने र सचेत गराउने कार्य आगामी दिनमा पनि जारी नै राखिने जानकारी दिए । 

जिल्ला प्रशासन कार्यालयमा दैनिक रुपमा अर्बुद रोगीको सिफारिस माग्न आठ नौ जना पुग्ने गर्छन् । यस्ता रोगीलाई उपचार गर्न सरकारले एक लाख रुपियाँ आर्थिक अनुदान दिने गर्छ । प्रजिअ रामकृष्ण सुवेदीले अर्बुद रोगीको सिफारिस पाऊँ भनी कार्यालयमा आएका रोगीको अवस्था देखेर सार्वजनिकस्थलमा चुरोट पिउने कार्यलाई नियन्त्रण गर्ने अभियान सञ्चालन गरिएको बताए । 

पुरुष धूमपानका अम्मली घट्दो 

आयोजक संस्थाका अध्यक्ष आनन्द चन्दले पछिल्लो समय चुरोट र खैनीका बट्टामा यसका बारेमा दिइएका सूचना र छापिएका तस्बिरका कारण चुरोट सेवनकर्ता घटिरहेको जानकारी दिए । संस्थाले गरेको अध्ययनअनुसार दैनिक ११ खिल्लीसम्म सेवन गर्नेहरु बट्टामा छापिएका सूचना र तस्बिर देखेर पाँच खिल्ली सेवनमा झरेका छन् । 

हाल सुर्तीजन्य पदार्थ सेवनबाट निम्तिने रोगबाट बर्सेनि १५ हजारले अकालमा ज्यान गुमाउनु परिरहेको छ । अर्कातर्फ पछिल्लो समय सहरी क्षेत्रका युवतीहरुले चुरोट सेवन गर्नाले शरीर पातलो हुन्छ भन्ने गलत मानसिकताले यसको सेवनमा वृद्धि भइरहेको बताइन्छ । 

सरकारले सुर्तीजन्य पदार्थको बट्टामा ९० प्रतिशत यसको हानिका बारेमा छापिएका जानकारी तथा तस्बिर छाप्नुपर्ने व्यवस्था गरेको छ । कार्यक्रममा चिकित्सकद्वय विष्णुदत्त पौडेल र तारासिंह बमले सुर्तीजन्य पदार्थमा पाइने निकोटिन र टार भन्ने तत्वले मुख र फोक्सामा अर्बुद रोग हुने बढी सम्भावना रहेको बताए । 

पछिल्लो समय विश्व स्वास्थ्य सङ्गठनले सुर्तीजन्य पदार्थको बट्टा अथवा खोलमा शतप्रतिशत नै यसका हानिबारेमा जानकारी दिने सन्देश वा तस्बिर राख्न आह्वान गरेको छ । रासस