शनिबार १७ कात्तिक, २०८१ | Saturday Nov 02, 2024
भक्तपुरः सामूहिकरुपमा विद्युत् चोरी गरेर ७३ घरमा खानेपानी वितरण गर्दै आएको गिरोहलाई प्रहरीले पक्राउ गरेको छ । नेपाल विद्युत् प्राधिकरण भक्तपुर वितरण शाखाले सूर्यविनायक नगरपालिका–६ गणेश मन्दिर जाने बाटोमा ज्योति एकेडेमी नजिकैकाले विद्युत् चोरी भइरहेको सूचना दिएपछि प्रहरीले तीन जनालाई पक्राउ गरेको छ ।
प्रहरीले चोरी भएको स्थानबाट चोरीमा प्रयोग भएको पानी तान्ने मोटर, तार र अन्य सामग्री नियन्त्रण लिने क्रममा अवरोध गरेपछि महानगरीय प्रहरी वृत्त जगातेको टोलीले उनीहरूलाई पक्राउ गरेको हो ।
पक्राउ पर्नेमा कान्छा तमखु, लक्ष्मी प्रजापति, रत्नकाजी मानन्धर रहेका छन् । तकोपली खानेपानी उपभोक्ता समितिका अन्य पदाधिकारी फरार छन् । खानेपानी उपभोक्ता समिति गठन गरेर प्रति घरधुरी रु दुई हजार ५०० प्रतिमहिना शुल्क लिएर पानी वितरण गर्दै आएको उक्त उपभोक्ता समूहले १४ वटा पोलबाट ५०० मिटर पर तार लगेर विद्युत् चोरी गरेको पाइएको प्रहरीले जानकारी दिएको छ ।
विद्युत् प्राधिकरण भक्तपुर वितरण शाखाका प्रमुख विक्रम अमात्यले हुक हालेर १४ वटा पोल पार गर्दै जमिन मुनीको पानी चोरीको विद्युत्बाट तानेर वितरण गर्दै आएको तीन दिनको अनुगमनबाट खुलेको बताए ।
अमात्यले भने, “खानेपानी उपभोक्ता समिति नै गठन गरेर लामो समयदेखि मिटर जडान नगरी विद्युत् चोरी गरेर जमिन मुनीको पानी दोहन गर्दै पानी वितरण गरेको पायौँ, चोरीमा प्रयोग भएका सामाग्री नियन्त्रण लिन खोज्दा अवरोध गर्न आएपछि पक्राउ गरिएको हो ।”
प्राधिकरणले समितिलाई क्षतिपूर्ती र जरिवाना गरी रु दुई लाख ५२ हजार १०० निर्धारण गरिएको बताउँदै उहाँले रकम भुक्तानी गरेपछि पक्राउ परेकालाई छाडिने पनि बताए ।
