काठमाडौंः नक्कली नोट छापेको आरोपमा पक्राउ परेका ‘लुट’ फिल्मका निर्माता माधव वाग्लेसहित तीन जनालाई जिल्ला अदालत काठमाडौंले जेल चलान गर्न आदेश दिएको छ ।
उक्त अदालतका न्यायाधीस शिवप्रसाद खनालको इजलासले बुधबार वाग्लेसँगै सुदीप घिसिङ र महेन्द्र बोगटीलाई पुर्पक्षका लागि जेल चलानको आदेश दिएको हो। सोही मुद्दामा पक्राउ परेका प्रकाश सुवेदी र विवेक नापित एक–एक लाख धरौटीमा छुटेका छन् भने साजन भुलुन साधारण तारिखमा छुटेका छन्।
प्रहरीले गत जेठ २ गते दुई करोड ५० लाख नक्कली नोटको कारोबारको आरोपमा वाग्लेलगायतलाई पक्राउ गरेको थियो । वाग्लेले नयाँ चलचित्र ‘चङ्गाचेट’ निर्माणको खर्च जुटाउनका लागि नक्कली नोट छापेको बयान दिए पनि अदालतले उनलाई दोषी औंल्याएको हो ।
