शनिबार १७ कात्तिक, २०८१ | Saturday Nov 02, 2024
काठमाडौंः बौद्धबाट तीन दिनअघि अपहरणमा परेका तीन जनालाई मुक्त गर्ने क्रममा शनिबार प्रहरी र अपहरणकारीबीच मुठभेड हुँदा एक अपहरणकारी गोली लागि घाइते भएका छन् ।
प्रहरीले घाइतेसहित तिनै जनालाई पक्राउ गरेको छ । प्रहरीको गोली लागि दुर्गा तामाङ घाइते भएका हुन । उनको घुँडामुनी गोली लागेको छ । तामाङको वीर अस्पतालमा उपचार भइरहेको महानगरीय प्रहरी अपराध महाशाखाका प्रहरी उपरीक्षक प्रकाशजंग कार्कीले जानकारी दिए ।
अपहरणकारीले बौद्धबाट मनदोर्जे तामाङ, विशाल तामाङ र आङदोङ तामाङलाई अपहरण गरी स्वयम्भुको एक घरमा बन्धक बनाएर राखेका थिए । अपहरणमा पर्ने तीनै जना नुवाकोट निवासी हुन । प्रहरीको प्रारम्भिक अनुसन्धानअनुसार फिरौतीका लागि उनीहरुलाई अपहरण गरिएको हो ।
प्रहरीले तीन दिनदेखि खोजी गरिरहेको थियो । अपहरणकारी मध्येका एकजनाको परिवारलाई साढे छ लाख रुपियाँ पैसा लिएर स्वयम्भु आउनु भनी अपहरणकारीले बोलाएपछि प्रहरी घटनास्थलसम्म पुग्न सफल भएको हो । प्रहरीले घटनास्थलबाट एक थान पेस्तोल र तीन राउण्ड गोली बरामद गरेको जनाएको छ ।
