शुक्रबार १८ असोज, २०८१ | Friday Oct 04, 2024
सोलुखुम्बु । निर्माण सम्पन्न भई उत्पादनको तयारीमा रहेको सोलुखोला दुधकोसी जलविद्युत् आयोजनामा पानी परीक्षण गर्दा पाइप बिस्फोट भई दुई जना इन्जिनियरको मृत्यु भएको छ । कुल ८६ मेगावाट क्षमताको यो आयोजनामा आइतबार बेलुकी यो दुर्घटना भएको हो ।
दुर्घटनामा आयोजनाका व्यवस्थापक गम्भीर घाइते भएको समाचार छ । सुरुङ निर्माण सम्पन्न भई विद्युत् उत्पादनको अन्तिम तयारीमा रहेको सोलुखोला दुधकोशीमा फलामको पाइपमा पानी हाल्ने क्रममा पाइप पड्किएर मावनीय क्षति भएको हो । मृत्यु हुनेमा २६ बर्षीय इन्जिनियर सुवाश रेग्मी र २९ बर्षीय अर्जुन थापा छन् ।
रेग्मी आयोजनाको हाइड्रो मेकानिकलको जिम्मा लिएको माछापुच्छ्रे मेटल एन्ड मेकानिकल कम्पनीका इन्जिनियर हुन् भने थापा कन्सल्ट्यान्ट इन्जिनियर हुन् । घटना हुँदा बेहोस भएका दुवैलाई उपचारका लागि लैजाने क्रममा नै मृत्यु भएको जनाइएको छ ।
त्यस क्रममा हाइड्रो मेकानिकल कम्पनीका प्रोजेक्ट म्यानेजर मोहम्मद राइन गम्भीर घाइते भएका छन् । उनलाई उपचारका लागि हेलिकप्टरमार्फत काठमाडौं लगिएको छ ।
