फिफा विश्वकप ट्रफीको रिप्लिका र २११ देशको झण्डासहित सगरमाथा आरोहण गर्दै नर्विन

काठमाडौं। कान्छा आरोही नर्विन रानामगरले फिफा विश्वकप ट्रफीको रिप्लिका र २११ सदस्य राष्ट्रहरुको झण्डा लिएर सर्वोच्च शिखर सगरमाथाको आरोहण गर्न जान लागेका छन् । 

उनले विश्वकप ट्रफीको रिप्लिका र २११ देशको झण्डा सगरमाथाको सफल आरोहणपछि सात महादेशका अग्ला शिखरहरूमा पुर्याउने योजना समेत बनाएका छन् । सगरमाथा आरोहणका लागि रानामगर अबको केही दिनमा लुक्ला हुँर्दै सगरमाथा आधार शिविर जाने तयारीमा छन् । उनले सगरमाथाको दुई पटक सफल आरोहण गरिसकेका छन् ।

फिफा विश्वकपमार्फत सबैलाई जोड्र्दै हिमालय क्षेत्रमा विश्व तापक्रममा भएको वृद्धिको प्रभावबारे सचेतना फैलाउने लक्ष्य समेत राखेका उनले बताए । सेभेन समिट फर फिफा वर्ल्डकप २०२२ नाम दिएर अभियानको थालनी गरेका रानामगरले आरोहणपछि उक्त ट्रफी, झण्डा आरोहणका क्रममा उपयोग भएका सामाग्रीहरु म्युजियममा हस्तान्तरण गर्ने योजना रहेको जानकारी दिए ।

उनले कोरोनाका कारण खेलकुद, अर्थतन्त्र र पर्यटन क्षेत्रलाई नराम्रो असर गरेको अवस्थामा ती क्षेत्रलाई आफ्नो अभियानले टेवा पुग्ने उनको विश्वास छ । रानामगरले विश्वको सबैभन्दा धेरै मानिसहरुको ध्यान अहिले फुटबलमा रहेको भन्दै विश्व शान्तिको लागि नेपालको तर्फबाट आफूले प्रतिनिधित्व गर्न लागेको पनि बताए । 

नेपालमा पर्यटनसम्बन्धी धेरै विषयको कोर्ष आफूले पूरा गरेको उनको भनाई छ । रानामगरले चार महादेशको हिमालहरु आरोहण गरिसकेको पनि बताए । सोलुखुम्बुका २३ वर्षीय आरोही नर्विन रानामगर संसारकै सबैभन्दा कान्छो पर्वतारोही पनि हुन् । 

उनले हालसम्म सगरमाथा, मनास्लु, किलिमञ्जरो, अफ्रिकाको भ्दिचगक, युरोपको माउन्ट एल्ब्रस, दक्षिण अमेरिकाको माउन्ट एकोनकागुआ लगायतको सफल आरोहण गरिसकेका छन् ।

पर्यटन तथा नागरिक उड्डयन मन्त्री प्रेम आलेले सगरमाथा आरोहणको तयारीमा रहेका रानामगरलाई ‘फिफा वर्ल्डकप ट्रफिको रिप्लिका’ हस्तान्तरण गर्दै बिदाई गरेका छन् । त्यस्तै, युवा तथा खेलकुद मन्त्री महेश्वरजंग गहतराजले पनि उनलाई शुभकामना दिँर्दै बिदाई गरेका छन् । नेपाल पर्वतारोही संघले पनि आफ्नो झण्डा उनलाई हस्तान्तरण गरेको छ ।