वैदेशिक व्यापार खुम्चियो, बिलासिताका वस्तुमा कडाई गर्दा १२.९० प्रतिशत आयात घट्यो

काठमाडौं । भन्सार विभागको तथ्यांकअनुसार चालू आर्थिक वर्षको पहिलो महिना (साउन) मा आयात–निर्यातमा कमी आएको छ । विदेशी मुद्राको संचितिमा चाप परेसँगै आयातमा गरिएको कडाईको प्रभावित  भएपछि आयात निर्यात खुम्चिएको हो । सरकारले सवारी साधन, सुनचाँदी, महँगा रक्सी, कुरमुरेलगायतका वस्तुहरूको आयातमा प्रतिबन्ध लगाएको छ । 

गएको साउनमा आयात १२.९० प्रतिशतले घटेको छ । अघिल्लो  बर्ष सोही अवधिमा एक खर्ब ५० अर्ब ७३ करोड १७ लाखको आयात भएकोमा यो बर्ष एक खर्ब ३१ अर्ब २८ करोड ६० लाख रुपियाँको आयात भएको छ । यो गत वर्षको तुलनामा १९ अर्ब ४५ करोड रुपियाँले कम हो । 

त्यसैगरी, निर्यात २८.६८ प्रतिशतले घटेको छ भने कूल वैदेशिक व्यापार १४.८१ प्रतिशतले खुम्चिएको छ । कूल वैदेशिक व्यापारमा निर्यातको हिस्सा १६.२८ प्रतिशतले खुम्चिएको छ भने कूल वैदेशिक व्यापारमा आयातको हिस्सा भने २.२४ प्रतिशतले बढेको छ । 

साउनमा १४ अर्ब ८० करोड ९७ लाख रुपियाँको निर्यात भएको छ । गत आर्थिक वर्षको सोही अवधिमा नेपालबाट २० अर्ब ७६ करोड ५१ लाख रुपियाँको निर्यात भएको थियो जुन चालू आर्थिक वर्षको तुलनामा २८.६८ प्रतिशतले बढी हो । 

भारत सरकारले दक्षिण एसियाबाट हुने निर्यात रोक्ने लक्ष्यसहित कच्चा पदार्थको भन्सार दर घटाएपछि नेपालबाट हुने खाने तेललगायत केही सामानको निर्यात प्रभावित बनेको छ । 

नेपालबाट गत वर्ष साउन मा आठ अर्ब ९८ करोडको भटमास तेल निर्यात भएको थियो जुन चालू वर्षको तुलनामा ६ अर्बभन्दा बढी हो । गएको साउनमा नेपालबाट जम्मा एक अर्ब ५९ करोडको भटमास तेल निर्यात भएको छ । त्यस्तै, पाम तेलको निर्यात भने डेढ अर्ब रुपियाँले बढेर तीन अर्ब ७३ करोड रुपियाँ पुगेको छ । नेपालबाट भारततर्फ हुने सूर्यमुखी तेलको निर्यात स्थिर छ ।

नेपालको व्यापार घाटा र वैदेशिक व्यापार पनि घटेको छ । गत साउनमा नेपालको व्यापार घाटा एक खर्ब १६ अर्ब ४७ करोड ६३ लाख रुपियाँमा आइपुगेको छ भने गत वर्षको सोही महिनामा नेपालको व्यापार घाटा एक खर्ब २९ अर्ब ९६ करोड ६६ लाख रुपियाँ थियो । 

त्यस्तै, गत वर्षको साउनमा एक खर्ब ७१ अर्ब ४९ करोड ६८ लाख रहेको वैदेशिक व्यापार गत साउनमा एक खर्ब ४६ अर्ब ९ करोड ५७ लाख रुपियाँमा आइपुगेको छ ।