तीन बर्षदेखि बन्द रहेको तिब्बतको कैलाश मानसरोबार यात्रा खुल्ला गर्ने तयारी

काठमाडौं । तीन वर्षदेखि बन्द रहेको तिब्बतको मानसरोबार यात्रा खुल्ला गर्ने तयारी गरिएको छ । नेपालमा आफ्नो अनुकुलको सरकार आएसँगै चिनियाँ पक्षले तिब्बततर्फको नाका खोलेर मानसरोबार यात्रा सुचारु गर्न लागेको हो । 

मानसरोबार यात्रा खुल्ला गर्न अन्तिम सम्झौताको तयारी भइरहेको एशोसियशन अफ कैलाश टुर अपरेटर्सका उपाध्यक्ष कृष्णप्रसाद ढकालले बताए । नेपालबाट वार्षिक २० देखि २४ हजारसम्म पर्यटक पवित्र धार्मिक स्थल कैलाश मानसरोवर यात्रामा जाने गरेका थिए । 

ढकालले कैलाश मानसरोवर यात्रा बन्द हुँदा व्यवसायीसहित तीर्थ यात्रीहरु निराह रहँदै आएका थिए भन्दै तिब्बतको नाका खोल्ने कुराले नयाँ संभावना बढेको बताए । उनका अनुसार चीनको सिमानासम्वन्धी निकायले आउँदो अंग्रेजी मे महिनाबाट यात्रा खुल्ला गर्न लागेको हो । यद्यपि यसको अन्तिम सम्झौता बाँकी रहेको ढकालले बताए । 

उनले अबको एक–दुई हप्ताभित्र अन्तिम सम्झौता हुने संभावना रहेको बताए । ढकालले भने, ‘ ‘कैलाश यात्रामा जानका लागि बुकिङहरु पनि आउन थालेको छ । तीन बर्षदेखि यो यात्रा बन्द थियो । यो यात्रा खुल्नासाथै नेपालमा पनि पर्यटकहरु बढ्ने छन् ।’

नेपालगञ्ज, सिमीकोट हुँदै हिल्सा नाकाबाट र काठमाडौं रसुवागढी हुँदै केरुङ नाकाबाट मानसरोबार पुग्न सकिन्छ । कैलाश यात्रा अफ सिर्जनमा हुने भएकोले होटल व्यवसायसहित समग्र पर्यटन क्षेत्रमा सकारात्मक असर पर्ने ढकालको भनाई छ ।   

ट्रेकिङ एजेन्सिज एशोसियशन अफ नेपाल (टान)का प्रथम उपाध्यक्ष प्रदीप पण्डितले आउँदो मे महिनाको पहिलो हप्तादेखि कैलाश यात्रा खोल्ने तयारी भएको बताए । केरुङ नाका खोल्ने कुरा चलेसँगै बुकिङहरु आउन थालेको उनले बताए । पण्डितले भने, ‘नेपाल माउन्ट कैलाश मानसरोवर जाने प्रवेशद्धार हो । कैलाश यात्रामा जाने धार्मिक पर्यटकहरुले पशुपतिनाथ र मुक्तिनाथ दर्शन गर्ने भएकाले नेपालमा पर्यटक आगमनमा पनि वृद्धि हुन्छ ।’ 

नेपाल पर्यटन बोर्डका निर्देशक मणिराज लामिछानेले केरुङ नाका खुल्यो भने विशेषगरी भारतीय पर्यटकहरुको संख्यामा वृद्धि हुने बताए । पर्यटकहरु नेपाल हुँदै कैलाश जानुपर्ने भएकाले नेपालमा धार्मिक पर्यटक बढ्ने उनले बताए ।  

कैलाश यात्रालाई ‘ब्रह्माण्डको केन्द्रमा आध्यात्मिक यात्रा’को रुपमा हेरिन्छ । कैलाश भनेको खाङ रिम्पोचे भएको र यसले हिउँको बहुमूल्य रत्नलाई जनाउने धार्मिक व्यक्तिहरुको भनाई छ । माउन्ट कैलाश (६,७१४ मिटर) उचाइमा रहेको छ । निकै ठूलो शक्ति रहेको मानिने यस पहाडमा भगवान शिव पार्वतीको वास हुने धार्मिक विश्वास छ । 

कैलाश मानसरोबारलाई हरेक वर्ष हजारौं तीर्थयात्रीहरूले परिक्रमा गर्छन् । तर कसैले पनि चढ्ने प्रयास गरेका छैनन् । माउन्ट कैलाशको ओभरल्याण्ड भ्रमणले हिन्दू, बौद्ध, जैन र बोन धर्महरूको आध्यात्मिक केन्द्रमा लैजान्छ । 

कैलाश मानसरोवर यात्रा काठमाडौं–ल्हासा हवाई मार्ग, काठमाडौं–हिल्सा स्थल मार्ग, काठमाडौं–केरुङ रुट, काठमाडौं–तातोपानी रुट हुँदै जान सकिन्छ ।