आइतबार १३ असोज, २०८१ | Sunday Sep 29, 2024
काठमाडौं। गृह मन्त्रालयले स्वीकृतिबिना छापिएका सबै खालका पात्रोहरु जफत गरी प्रकाशित गर्नेलाई कारवाही गर्न सबै जिल्ला प्रशासन कार्यालयलाई निर्देशन दिएको छ ।
बजारमा अनधिकृतरूपमा प्रकाशन भएका पात्रो, भित्तेपात्रो र गोजीपात्रो निकै धेरै देखिएको बेला मन्त्रालयले त्यसको निरीक्षण अनुगमन गरी नियन्त्रण गर्न र प्रकाशित गर्नेलाई कारवाही गर्न जिल्ला प्रशासन कार्यालयहरुलाई पत्राचार गरेको हो ।
मन्त्रालयको परिपत्रमा मन्त्रिपरिषद्ले समेत सार्वजनिक बिदाका सम्बन्धमा निर्णय लिँदा नेपाल पञ्चाङ्ग निर्णायक विकास समितिले तयार पारेको ‘डेट प्याड’ समेतलाई आधार लिने गरेको भन्दै उक्त समितिको स्वीकृतिबिना छपाइएका पात्रो, भित्तेपात्रो र गोजीपात्रो गैरकानुनी भएको बताएको छ ।
पात्रो, भित्तेपात्रो र गोजीपात्रो प्रकाशन गरी बिक्री, वितरण गराउने काम समितिको गठन आदेश, २०७७ मा उल्लेख भएकाले अनधिकृतरूपमा स्वीकृति नलिई प्रकाशन भएका पात्रो, भित्तेपात्रो र गोजीपात्रो अवैध भएको मन्त्रालयको भनाई छ ।
समितिको आन्तरिक व्यवस्थापन दिग्दर्शन, २०७९ मा पञ्चाङ्ग (पात्रो), भित्तेपात्रो र गोजीपात्रो प्रकाशन गर्न चाहनेले नियमानुसार स्वीकृति लिनुपर्ने उल्लेख छ । स्वीकृति लिएर प्रकाशन भए वा नभएको स्थानीयरूपमा निरीक्षण तथा अनुगमन जिल्ला प्रशासन कार्यालयबाट हुने व्यवस्था समितिको दिग्दर्शनमा रहेको छ ।
सरकारले बिदा स्वीकृत गर्नुपूर्व नै स्वीकृति नलिई गलत मुहूर्त र चाडपर्व राखी प्रकाशन भएका पात्रो, भित्तेपात्रो र गोजीपात्रो बजारमा छ्याप्छ्याप्ती रहेकाले निरीक्षण एवं अनुगमन गरी सचेत गराउन र आगामी वर्षदेखि यस्ता काम कारबाही नियन्त्रण गर्न वा गराउन पनि मन्त्रालयले जिल्ला प्रशासन कार्यालयहरूलाई निर्देशन दिएको छ ।
गृह मन्त्रालयको परिपत्रपछि अनधिकृतरूपमा प्रकाशन भइरहेका पात्रो, भित्तेपात्रो र गोजीपात्रोका कारण चाड, पर्व, तिथि, मितिका बारेमा हुने समस्या समाधान हुने विश्वास लिएको समितिले जनाएको छ ।
