आइतबार २ मंसिर, २०८१ | Sunday Nov 17, 2024
आइतबार २ मंसिर, २०८१ | Sunday Nov 17, 2024
काठमाडौं । सविन भट्टाचार्य र उमाकान्त सिटौला कुनै समय वैदेशिक रोजगारीमा थिए । तर अर्काको मुलुकमा लामो समय बिताउन उनीहरुले उचित ठानेनन् । आफ्नो भूमिमा केही गर्नुपर्छ भन्यो लाग्यो र नेपाल फर्किएर ‘माली दाई नर्सरी प्रा.ली.’ नामक कम्पनी संस्थापना गरी नर्सरी सञ्चालनमा ल्याए ।
काभ्रे भकुण्डेबेसींमा रहेको माली दाई नर्सरी सञ्चालनमा आएको छ महिना भयो । छ लाख रुपियाँ लगानीमा सुरु भएको यो नर्सरीमा तराईका विभिन्न स्थानबाट कागतीका बिरुवा संकलन गर्ने र नर्सरीमा ल्याई बिरुवा उमार्ने गर्दछ ।
काठमाडौंमा जग्गा सस्तो भाडामा नपाउने भएकाले भकुन्डेबेसींमा १२ आना जग्गा भाडामा लिएर कागतीका बिरुवाको व्यवसाय गर्दै आएको दुई लगानीकर्ता मध्येका एक सविन भट्टाचार्यले बताए ।
उनको नर्सरीबाट कागतीबाहेक सुन्तला, अम्बा, मुन्तालालगायतका बोटबिरुवा बिक्री वितरण हुँदै आएको छ । बाह्रै महिना फल दिने बिरुवा भएका कारणले कागती बढी मात्रामा बिक्री हुने भट्टाचार्यले बताए । उनले बोटबिरुवा चावहिलको आफ्नो कार्यालबाट बिक्री हुने गरेको बताए । माली दाई नर्सरीमा छ जनाले काम गर्दैआएका छन् ।
भट्टाचार्यले भकुन्डेबेसींमा बोटबिरुवा उमार्न अनुकुलको हावापानी रहेको सुनाउँदै आफूहरुले उमार्ने बोटबिरुवा धेरै स्थानीयले नै खरीद गर्ने बताए । एउटा कागतीको बिरुवाको पाँच सयदेखि दुई हजार पाँच सयसम्ममा बिक्री हुन्छ ।
उनले भने, ‘कागतीको बिरुवाको दैनिक अर्डर आउँछ राजधानी बाहिर १० देखि १५ स्थानबाट अर्डर आउने गरेको छ । नेपालगञ्ज, कैलाली, गाईघाट, काँकरभित्ता, दमक, भैरवाहलगायतका थुप्रै ठाउँमा जाने गरेको छ ।’
नर्सरीबाट मासिक एक लाख रुपियाँ मुनाफा हुने गरेको भट्टाचार्यले बताए । उनले प्रतिस्पर्धाको बजार भएका कारणले व्यापारमा नाफा भन्दा पनि ग्राहक बढाउनपट्टि लाग्नुपर्ने अवस्था रहेको बताए । बजारमा ग्राहकले नयाँ कुरा रुचाउने भएकाले पूरानो प्रविधिलाई नयाँ जस्तो देखाउनुपर्ने उनले बताए ।
