भ्वाइसको व्यापार घट्दा एनसेल र नेपाल टेलिकमको व्यापारमा ३० प्रतिशतसम्म गिरावट

काठमाडौं। टेलिफोन सेवा प्रदायक दुई कम्पनीको व्यापार पछिल्लो दुई महिनामा भारी गिरावट आएको छ । नेपाल दुरसञ्चार कम्पनी लिमिटेड (नेपाल टेलिकम) र निजी क्षेत्रको एनसेल एजियटा लिमिटेडको व्यापारमा आश्चर्यजनक गिरावट देखिएको हो । 

दुवै कम्पनीहरुको अपरिस्कृत वितीय विवरणअनुसार गएको चैत र बैशाखमा अघिल्ला महिनाहरुको तुलनामा २० देखि ३० प्रतिशतले कारोबार घटेको देखिन्छ । औषत मासिक तीन अर्ब २३ करोड रुपियाँको व्यापार गरिरहेको नेपाल टेलिकमको कारोबार ३० प्रतिशतले घटेको छ । यस्तै, चालु आर्थिक वर्षमा मासिक दुई अर्ब ८० करोड रुपियाँको हाराहारीमा व्यापार गरिरहेको एनसेलको पनि २५ देखि ३० प्रतिशतले कारोबारमा गिरावट देखिएको छ।

अधिकारीले भने ‘विश्वमा नै भ्वाइसको व्यापारमा गिरावट आइरहेको छ । यो ट्रेण्ड विगत पाँच वर्षबाट नै सुरु भएको हो । यसले एक महिनादेखि अर्को महिनामा तत्कालै असर भने देखाउँदैन् । तर महिना–महिनामै कारोबार घटिबढि हुनुमा धेरै कारणहरु हुन सक्छ ।’

एनसेलका अनुसार जुन बेलामा चुनाव, चाडपर्व यस्तै खालका धेरै गतिविधि हुने गर्छ, सो बेलामा टेलिकमको कारोबार समेत बढि हुने गर्दछ । गतिविधि कम भएको बेलामा कारोबार समेत घट्ने गर्दछ । 

कम्पनीको डाटाको व्यापार बढिरहेको भए पनि भ्वाइसको व्यापार भने घट्दो क्रममा रहेको भन्दै कम्पनीले पहिले पहिलेको व्यवसायको तुलनामा कम्पनीको आयमा ठूलो गिरावट आएको स्वीकार गरेको छ ।  

एमसेल स्रोत भन्छ, ‘विदेशबाट हुने अधिकांश टेलिफोनहरु ह्वाट्स एप, फेसबुक, भाइबर इत्यादीबाट हुने गरेको छ । यसले पनि कारोबार घटाउँदै लगेको छ ।’ 

दुवै कम्पनीको अपरिस्कृत विवरणअनुसार नेपाल टेलिकमले ६ महिनामै १९ अर्ब ४० करोडको व्यापार गरेको छ भने एनसेलले चालु वर्षको ६ महिनामा १६ अर्ब ८० करोडको व्यापार गरेको छ । गत आर्थिक वर्ष २०७८–७९ मा नेपाल टेलिकमले करिब ४५ अर्बको व्यापार गरेको थियो । यस्तै, एनसेलले ४० अर्ब २८ करोडको व्यापार गरेको थियो ।

इन्टरनेट सेवाको विस्तार भएसँगै टेलिकम कम्पनीहरुको कारोबारमा गिरावट आइरहेको छ । टेलिफोनबाट गरिने कुराकानी कम्पनीहरुसँग सुरक्षित हुने भएकाले पनि ग्राहकहरु डिजिटल मोबाइल एपबाट कुराकानी गर्नतर्फ आकर्षित हुँदै गएको देखिन्छ ।