राजधानीबाट नजिकको जुगल हिमाल आरोहण खुल्ला भएसँगै सिन्धुपाल्चोकमा चहलपहल

काठमाडौं । सिन्धुपाल्चोकको जुगल गाउँपालिकामा पर्ने पाँच वटा हिमालहरु आरोहणको लागि खुल्ला गरिएको छ । यससम्वन्धी मन्त्रिपरिषद्को निर्णय राजपत्रमा प्रकाशित भएसँगै ती हिमालमा व्यवसायिक आरोहणको बाटो खुलेको नेपाल पर्वतारोहण संघले जनाएको छ ।

सिन्धु पर्यटन परिषद्का महासचिव तथा जुगल गाउँपालिकाको पर्यटन विभागको अध्यक्ष मिलन तामाङले आरोहण खुल्ला गरेका हिमालहरु जुगल–१, जुगल–२, जुगल–३, जुगल–४, जुगल–५ छन् । काठमाडौंबाट नजिक रहेकाले यी हिमालहरु आरोहीहरुको लागि आकर्षण हुने उनको विश्वास छ । 

अब आगामी सिजनदेखि जुगल–१ (६,५९१ मिटर), जुगल–२ (६,५१८ मिटर), जुगल–३ (६,१८४ मिटर), जुगल–४ (५,९३६ मिटर) र जुगल–५ (५,९२२ मिटर) पर्वतारोहणका लागि खुला गरिएको छ ।

मिलन तामाङले हिमाल आरोहणको लागि खुल्ला गरिएसँगै जुगल क्षेत्रमा विदेशी तथा आन्तरिक पर्यटकहरुको आगमनको संख्यामा वृद्धि हुने आशा व्यक्त गरे । उनले भने, ‘यहाँ हिमाल मात्र नभएर धार्मिक स्थलहरु, विभिन्न संस्कृतिक सामुदायका मानिसहरु पनि बसोबास गर्छन् । अब पदयात्रा र हिमाल आरोहणको आकर्षण पनि बढेको छ ।’ 

थोरै समय र थोरै खर्चमा हिमाल आरोहण गर्छु भन्नेहरु धेरै रहेकोले यी हिमाल उपयोगी हुने तामाङको तर्क छ । उनले थपे, ‘नेपालमा पर्यटकहरु हिमाल आरोहण गर्न बिदा लिएर आउनुपर्छ । जस्तै सगरमाथा आधार शिविर पुगेर फकिन १२–१४ दिन लाग्छ । तर जुगलमा थोरै खर्च र कम समयमा पनि फर्किन सकिन्छ ।’

जुगल हिमाल आरोहणको लागि बुकिङहरु पनि आउन सुरु भइसकेको छ । तामाङले एक–दुई बर्षमा जुगल क्षेत्रमा पर्यटकहरुको राम्रो चहलपहल हुने बताए । नेपाल पर्वतारोहण संघबाटै आरोहण अनुमति लिन पर्यटन विभागसँग संघको कुराकानी भइरहेको बताउँदै उनले त्यस्तो भयो भने सहज हुने जिकिर गरे । पर्यटन विभागले कम्तिमा पनि दुई वर्ष अनुमति निःशुल्क गर्न मन्त्रिपरिषरिषदमा प्रस्थाव पठाएको पनि तामाङले जानकारी दिए । अनुमति निःशुल्क भयो भने जुगल हिमालको झन प्रचार हुने उनले बताए । 

जुगल हिमाल आरोहण गर्न जाने क्षेत्रमा अहिले दुई ठाउँमा होमस्टे र त्यसभन्दा माथि माउन्टेन हट (काटको घर) रहेको छ । त्यो सरकारले निर्माण गरेको उनले जानकारी दिए । स्थानीयले पनि घरहरु निर्माण थालेको बताउँदै तामाङले नेपालमा पहिलो चोटी साहसिक यात्राका लागि प्रयोग गरिने ‘भिया फराता’ अर्थात् फलामको बाटो निर्माण गरिएको जानकारी दिए । जुगल हिमालकै आधार क्षेत्रमा धार्मिक महत्वको नेपेमाछल अर्को थप आकर्षक थलो हो । आठौं शताब्दीमा यो ठाउँमा गुरु रिन्पोचे (गुरु पद्मासम्भव)ले लामो समय बिताएको बुद्धिस्ट पुस्तकहरुमा उल्लेख गरेको पाइन्छ ।

थप पाँचसहित नेपालमा आरोहण खुल्ला गरेका हिम चुचुराको संख्या ४१९ पुगेको छ ।