देउवालगायतका नेता देश छोडेर विदेश पलायन !

काठमाडौं । हास्यव्यंग्य कलाकार जितु नेपालले मुन्द्रेको कमेडी क्लव अपेक्षा गरेअनुसार नचलेको बताएका छन् । सोमवार राजधानीमा जितुको हास्यव्यंग्य गाईजात्रा २०८० को बारेमा आयोजित पत्रकार भेटघाटका क्रममा उनले सो कुरा स्वीकार गरेका हुन् । 

जितुले दर्शक कम हुनुमा उस्तै कमेडी विधाका अन्य कार्यक्रमहरु बाँडिनु रहेको बताए । उनले तुलनात्मक रुपमा पहिलाको जस्तै युट्युबमा भ्युअर्समा कमी आएको बताउँदै पहिला ठूलो सेटमा कार्यक्रम गर्ने गरेको तर अहिले खुम्चिएर सानो सेटमा कार्यक्रम गर्न बाध्य भएको गुनासो गरे । 

उनले गाईजात्रामा आफूले राजनीतिक र समसामयिक विषयवस्तुहरु उठान गरेको बताए । उनले राजनीतिक नेताहरुलाई व्यंग्य गर्ने काममा मात्रै गाईजात्रा सकियो नि ? भन्ने सिने पत्रकारको प्रश्नमा जितुले गाईजात्रा पहिलाबाट नै राजनीतिक रुपमा व्यंग्य गर्ने गरेको बताए । उनले अन्य बेलामा अन्य विषय र कलाकारहरुलाई व्यंग्य गर्नसकिने तर राजनीतिप्रति खुलेर व्यंग्य गर्न पाइने एउटै अवसर गाईजात्रा भएकाले पनि नेताहरुलाई बढी व्यंग्य गरेको बताए । 

जितुले गाईजात्राको भिडियोमा काँग्रेस सभापति शेरबहादुर देउवा देश छोडेर विदेश पलायन भएको विषयवस्तु उठाइएको बताए । साथै अन्य नेताहरु पनि देश देशलाई खाल्डोमा हालेर देश छोडेर विदेश पलायन भएको लगायतका विषयवस्तुहरुमाथि व्यंग्य गरिएको उनले बताए । 

जितुले थपे, ‘अरु कुरामा हामीले अरु बेला पनि हासि मजाक गर्न पाउँछौँ । कलाकारलाई रोष्ट गर्ने अरु बेला पनि छन्, गाईजात्रामा नेतालाई नै केन्द्रित गरेको हो । शुरुवात आदरणीय हरि दाई, मदन दाईले पनि राजनीतिलाई नै केन्द्र बनाएर गाईजात्रा गर्नुभएको हो । समग्र कुराको केन्दिबिन्दु राजनीति र नेताहरुसँगै केन्द्रित छ नि त । हामीले सामाजिक विषयवस्तु पनि उठाएका छौँ । पुण्य गौतमजीहरुलाई व्यंग्य गरेर केही हुँदैन, उहाँहरुले सरकारी पदमा बसेर कुनै केही बिगार्नुभएको छैन । राजनीति बिग्रियो है भनेर गाईजात्राबाट भनेका हौँ । शेरबहादुर देउवाजीमात्रै होइन सबै विदेश जाँदै हुनुहुन्छ, हाम्रो गाईजात्रामा ।’

कार्यक्रममा वरिष्ठ हास्य कलाकार सुरेन्द्र केसी (मुला साग) ले मुन्द्रेको कमेडी क्लव बिस्तारै मैदानमा खरो उत्रिरहेको बताए । उनले भने, ‘मुन्द्रको कमेडी क्लव चलिरहेको छ । उ खेलाडी हो, मैदानमा छ, कति फल भए, कति गोल भए, कति प्रयास भए, कति असिस्ट भए । तर मैदानमा नै छ उ, मैदानबाट भागेको छैन ।’

गाईजात्रा २०८० नजिकिएसँगै कलाकारहरु हास्यव्यंग्यमार्फत समाज, देश र विदेशका राजनीतिक, समसामयिक विषयवस्तुमाथि व्यंग्यात्मक कार्यक्रम लिएर आउन थालेका छन् । गाईजात्राको अवसरमा हरेक वर्ष कलाकारहरुले आफ्ना व्यंग्यात्मक प्रश्तुती दर्शक र श्रोतामाझ पस्किँदै आएका छन् ।