शेयर बिक्रीको नाममा एनसेल ठेक्कामा, अबको ६ वर्षको नाफा आजियाटाले नै पाउने

काठमाडौं । एनसेल आजिआटा लिमिटेडको शेयर होल्डिङ कम्पनी आजियटा ग्रुप बर्नाडले ९९ अर्ब ६७ करोड ९९ लाख घाटा खाएर आफ्नो शेयर स्वामित्व बेलायती एक कम्पनीलाई बिक्री गरेको समाचार आज (शुक्रबार) बाहिर आयो । 

ठूलो रकम घाटा खाएर नाम मात्रैको बेलायती कम्पनीलाई शेयर बिक्री गर्नुले धेरै आशंकाहरु जन्माएको छ । आजियटाले सन् २०१६ मा एनसेलको माउ कम्पनी रेनोल्ड होल्डिङबाट एक अर्ब २६ करोड ५१ लाख डलर अर्थात (एक खर्ब ४६ अर्ब ६७ करोड)मा शेयर खरिद गरेको थियो । यो खरिदको आठ वर्षपछि ९९ अर्ब ६७ करोड ९९ लाख घाटा खाएर मलेसियन कम्पनी आजियटाले स्वामित्व बिक्री गरेको हो । 

आजियटाले एनसेलमा रहेको ८० प्रतिशत शेयर सबै बेलायती स्पेकट्रलाइट युकेलाई बिक्री गरेको दाबी गरेको छ । बाँकी २० प्रतिशत शेयर स्थानीय साझेदार सुनिभेरा क्यापिटल भेन्चर प्रा.लि.को रहेको छ जुन कम्पनी भावना सिंह श्रेष्ठको हो । उनका श्रीमान सतिशलाल आचार्य टेलिकम माफियाको रुपमा चिनिन्छन् । सिंगापुरमा बसेर नेपालमा व्यापार गर्दै आएका उनले बेलायतमा नाम मात्रैको कम्पनी खडा गरी आजियटाको शेयर उक्त कम्पनीले किनेको देखाएका हुन् ।  

एनसेलद्धवारा आज जारी प्रेस विज्ञप्तिमा जनाइएअनुसार आजियाटाले शेयर बिक्री गरे पनि सन् २०२९ सम्मको एनसेलको लाभांश उसैले लैजान पाउँछ । सो कुरा शेयर पर्चेज अग्रिमेन्ट (एसपीए)मा रहेको विज्ञप्तिमा उल्लेख छ । तर आजियटाले कति प्रतिशत लाभांश पाउने हो ? सो कुरा भने खुलाइएको छैन् । सहमतिअनुसार स्पेकट्रलाइट युकेले भने एनसेलको व्यापारबाट आएको मुनाफा आजियाटालाई बुझाउनु पर्नेछ । 

स्पेकट्रलाइट युके बेलायतमा भर्खरै (यसै बर्ष २०२३) मा खोलिएको कम्पनी हो जसमा आचार्यको लगानी रहेको स्रोतको भनाई छ । यसमा छद्मभेसी रुपमा आजियाटाकै स्वामित्व हुनसक्ने अनुमान पनि गरिएको छ । एनसेलनिकट स्रोतका अनुसार यो सम्झौता शेयर बिक्री नभई कम्पनी केही बर्षका लागि भाडामा दिएको जस्तो देखिन्छ । 

दूरसञ्चारसम्बन्धी ज्ञान समेत भएका ती चार्टर एकाउन्टेनले भने, ‘कम्पनीले व्यापार गर्नको लागि दलाल कम्पनी खडा गरेको जस्तो देखियो । सन् २०२९ सम्मको लाभांश लैजान पाउने शर्तमा शेयर बिक्री भएको भनेर प्रष्टरुपमा विज्ञप्तिमा नै लेखिएको छ । यो भनेको त कम्पनी बिक्री भन्दा पनि ठेक्कामा दिएको भन्न मिल्छ । ठेक्कामा दिएपछि त हरेक बर्ष निश्चित रकम फाइदा लिन पाइन्छ । एनसेलमाथि आफ्नो नियन्त्रण पनि कायम भइरह्यो ।’ 

उनका अनुसार नेपालमा करको मामिला मिलाउने जिम्मा आजियटाले अब दलाल (सतिशलाल आचार्य)लाई दिएको छ । उसले आफै धेरै तनाव नलिने रणनीति बनाएको जस्तो देखियो । अब आजियटाले खुरुखुरु कमाइको नाफा मात्रै लैजानेछ । प्रारम्भिक चरणमा उनीहरुले कागजी प्रक्रिया मात्रै टुंग्याएको देखिन्छ । यहाँको अदालत, नियामक, कानुनीलाई अटेर गर्दै एकपक्षीयरुपमा गरेको शेयर खरिद बिक्री कसरी मिलाउँछ ? हेर्नु बाँकी छ ।  

आजियटाको समेत यस संयुक्त प्रेस विज्ञप्तिमा उसले नेपालमा व्यापारमैत्री वातावरण नपाएको दावी गरेको छ । आजियटाले आफू नेपालबाट बाहिरिनुमा सरकारी नीति र कम्पनीको लाइसेन्स नवीकरणलाई देखाएको छ । दूरसञ्चार सेवाको रुपमा कम्पनीको लाइसेन्स सन् २०२९ मा सकिँदै छ । त्यसपछि यो कम्पनी सरकारको हुनेछ ।  

यो पनि पढ्नुहोस्ः

अदालत र प्राधिकरणलाई चुनौति दिँदै एनसेलको शेयर बेलायती कम्पनीलाई बिक्री

​आफ्नो स्वीकृतिबिना एनसेलको शेयर खरीद बिक्री नगर्न आजियटा र सतिशलाई प्राधिकरणको निर्देशन

​अदालतको आजको आदेशले आजियटालाई एनसेलको शेयर बिक्री गर्न रोकेको छः डा भण्डारी

​आजियटालाई एनसेलको शेयर बिक्री सम्बन्धी उच्च अदालत पाटनको कारण देखाउ आदेश

एनसेलको शेयर सतिशलाललाई बिक्री गरेको देखाएर नियन्त्रण कायम गर्ने आजियटाको योजना

Court involvement to put a stop to defrauding foreign Exchange , Money Laundering by Axiata, Bhavana singh and Satish Lal