मङ्गलबार २७ कात्तिक, २०८१ | Tuesday Nov 12, 2024
मकवानपुर । उद्योग वाणिज्य तथा आपूर्तिमन्त्री रमेश रिजालले जीर्ण तथा बन्द उद्योगलाई सार्वजनिक निजी साझेदारी (पिपिपी) मोडलमा सञ्चालन गर्नुपर्ने बताएका छन् ।
उद्योग संघ मकवानपुरको २२औं साधारणसभा एवं अधिवेशनलाई सम्बोधन गर्दै मन्त्री रिजालले बन्द तथा जीर्ण उद्योग पिपिपी मोडलमा सञ्चालन नगर्ने हो भने सरकारको लगानी व्यर्थ हुने बताए । मन्त्री रिजालले औद्योगिक क्षेत्रको पूर्वाधार निर्माणका लागि सरकारले बजेट विनियोजन गरेको बताउँदै राज्यलाई गाली गरेर मात्र समृद्धि नआउने बताए ।
मन्त्री रिजालले हेटौंडा कपडा उद्योग सञ्चालनका लागि सरकारले नेपाली सेनासँग सहकार्यको तयारी रहेको जानकारी दिए । उद्योगसम्बन्धी समस्या समाधानका लागि ऐन, कानुनलई समयसापेक्ष बनाउनका लागि परिमार्जन आवश्यक रहेको उनको भनाइ थियो । ‘सरकार आवश्यक नीति, नियम तर्जुमा गर्ने, लगानीको वातावरण बनाउने, औद्योगिक सुरक्षाको प्रत्याभूति दिने, सरोकारवाला निकायबीच समन्वय गर्ने÷गराउने, करमा सहुलियत दिने, नवप्रवर्तनलाई प्रोत्साहन गर्ने नीतिसहित अघि बढेको छ,’ उनले भने ।
कार्यक्रममा नेकपा एमालेका सचेतक महेश बर्तौलाले सरकारले उद्योगी–व्यवसायीलाई लगानीको वातावरण तयार गरिदिनुपर्नेमा जोड दिए । उद्योगी निराश बनिरहेका बेला सरकारले उद्योगीलाई निर्यातमुखी उत्पादनमा प्रोत्साहन गर्नुपर्ने बर्तौलाको भनाइ थियो ।
सो अवसरमा प्रतिनिधिसभा सदस्य दीपकबहादुर सिंहले सरकारले उद्योगमैत्री वातावरण तयार गर्नका लागि नीतिगत सुधार गर्न अगुवाइ गर्नुपर्नेमा जोड दिए । बागमती प्रदेशसभा सदस्य इन्द्रबहादुर बानियाँले निकुञ्ज र मध्यवर्ती क्षेत्रका कारण उद्योगमा काम गर्न सक्ने अवस्था नदेखिएको भन्दै औद्योगिक क्षेत्र व्यवस्थापन कार्यालयको काम भाडा उठाउनेमात्र नभई उद्योगीलाई प्रोत्साहन गर्न प्रशासनिक प्रक्रिया सहज बनाउन जरुरी रहेको बताए ।
उद्योग संघ हेटौंडाका अध्यक्ष स्वागतराज प्याकुरेल राज्यले उद्योगी व्यवसायीको समस्या तत्काल हल गरी सहज वातावरण बनाइदिन आग्रह गरे ।
