नेपालगन्ज । बाँके पश्चिम नेपालका विभिन्न जिल्लामा तरकारी खेती गर्ने किसान र उत्पादन दुवै बढ्दै गए पनि भारतबाट हुँदै आएको आलुको आयात भने घट्नुको साटो बर्सेनि बढ्दै गएको पाइएको छ ।
नेपालगन्ज नाकाबाट मात्रै गत आव ०८०/८१ मा एक अर्ब ११ करोड बढीको आलु भारतबाट आयात भएको नेपालगन्ज भन्सार कार्यालयले जनाएको छ ।
नेपालगन्ज भन्सार कार्यालयका अनुसार गत आव ०८०/८१ मा नेपालगन्ज नाकाबाट मात्रै एक अर्ब ११ करोड ६१ लाख पाँच हजार रुपियाँको चार करोड ४९ लाख ८४ हजार ६६९ किलो आलु भारतबाट आयात गरिएको छ ।
भन्सार कार्यालयको तथ्याङ्क अनुसार अघिल्लो आव ०७९/८० भन्दा गत आवमा १८ करोड रुपियाँको आलु आयात वृद्धि भएको हो ।
आव ०७९/८० मा ९३ करोड ६० लाख ६९ हजार मूल्य बराबरको तीन करोड ७५ लाख ८५ हजार ८८ किलो आलु आयात गरिएको थियो ।
नेपालगन्ज भन्सार कार्यालयका सूचना अधिकारी पूर्णप्रसाद लम्सालले आलु आयातबाट नेपालगन्ज भन्सारले आव ०७९/८० मा १४ करोड ७७ लाख २२ हजार रुपियाँ राजस्व सङ्कलन गरेको थियो भने गत आव ०८०/८१ मा २७ करोड २२ लाख ४४ हजार राजस्व सङ्कलन गरेको बताए ।
आलुको आयात वृद्धि भएसँगै राजस्व सङ्कलन पनि अघिल्लो आवको तुलनामा गत आवमा १३ करोड रुपियाँ वृद्धि भएको भन्सार कार्यालयले जनाएको छ ।
कृषि ज्ञान केन्द्र नेपालगन्जका प्रमुख सकिल अहमद खाँले केही वर्षयता बाँके, बर्दिया, दाङ र सल्यानलगायतका जिल्लामा आलु उत्पादन उल्लेखनीय मात्रामा हुँदै आए पनि भारतबाट पनि आयात नघट्नुले माग अझै धेरै रहेको प्रमाणित भएको बताए ।
उनले आलु र प्याजमा आत्मनिर्भर बन्न सरकारले विभिन्न कार्यक्रम सञ्चालन गरिरहेको जनाउँदै अझै पनि यति ठूलो परिमाणमा आयात हुनुले चिन्ता बढाएको बताए ।