इरानलाई पराजित गर्दै नेपाल काभा महिला भलिबलको फाइनलमा

काठमाडौँ । नेपाल सेन्ट्रल एसियन भलिबल एसोसिएसन (काभा) महिला नेशन्स लिग भलिबलको फाइनलमा प्रवेश गरेको छ । आज भएको दास्रो सेमिफाइनलमा इरानलाई ३–० को सोझो सेटमा पराजित गर्दै नेपालले फाइनलमा भारतसँगको भेट पक्का गरेको हो ।  

त्रिपुरेश्वरस्थित राष्ट्रिय खेलकुद परिषद्को कभर्डहलमा समूह चरणको हारको बदला लिँदै नेपालले इरानविरुद्ध शानदार जित दर्ता गर्‍यो । 

खेलको तेस्रो सेट भने नेपालले २५–२० ले आफ्नो पक्षमा पार्न सफल भयो । प्रतियोगितमा नेपाल अंक तालिकाको दोस्रो र इरान तेस्रो स्थानमा रहँदै सेमिफाइनल प्रवेश गरेका थिए । 

यसअघि भएको लिग चरणको दोस्रो खेलमा इरानले नेपाललाई ३–२ को सेटमा पराजित गरेको थियो । सोही हारको बदला लिँदै नेपालले प्रतियोगिताको फाइनमा भारतसँगको भेट पक्का गर्न सफल भयो । 

लिग चरणको खेलमा नेपालले श्रीलङ्का र माल्दिभ्सलाई समान ३–० को सेट र भारतलाई ३–२ को सेटमा पराजित गरेको थियो । लिग चरणमा भारतसँग ३–१ को सेटमा पराजय बेहोरेको भने इरानले श्रीलङ्कालाई ३–२ तथा माल्दिभ्सलाई ३–० को सेटमा पराजित गरेको थियो । 

जितपछि नेपाली टोलीका मुख्य प्रशिक्षक जगदिश भट्टले अघिल्ला खेलमा भएका कमी कमजोरीलाई सुधार गर्दै इरानलाई पराजित गर्न सफल भएको बताए ।  

बुधबार हुने फाइनलमा नेपाल भारतविरुद्ध लिगचरणमा निकालेको जितलाई निरन्तरता दिने उद्देश्यका साथ उत्रनेछ । नेपाली टोलीका मुख्य प्रशिक्षक भट्टले भारतविरुद्ध यसअघिको जितलाई निरन्तरता दिनेमा विश्वास व्यक्त गरे । उनले भने, “आज इरानविरुद्धको खेलमा तीन सेटमा खेलेकाले भोलि पनि तीनै सेटमा भारतलाई पराजित गर्दै उपाधि जित्ने लक्ष्य लिएका छौँ ।” 

आजै भएको पहिलो सेमिफाइनलमा भारतले श्रीलंकालाई ३–० को सेटमा पराजित गर्दै प्रतियोगिताको फाइनलमा स्थान बनाएको थियो ।