हामी जस्ता राजनीतिक मान्छेलाई चाडपर्व आएको याद नै हुँदोरहेनछः पर्यटनमन्त्री पाण्डे

काठमाडौं । संस्कृति, पर्यटन तथा नागरिक उड्डायन मन्त्री बद्री पाण्डे मन्त्री भएपछि यति व्यस्त भएका छन् कि उनी दशैं मनाउन गृहजिल्ला बाजुरा जान यस पटक समय निकाल्न सकेनन् । 

काठमाडौंको सेरोफेरोमा नै दशैं मनाइरहेका उनी एक पटक भने बाजुरा पुग्ने मनस्थितिमा छन् । पाण्डे भन्छन्, ‘म दशैं नै भनेर जान्न होला । यसैको सेरोफेरोमा एक पटक बाजुरा पुग्ने योजना छ । किनभने म मन्त्री पदमा नियुक्त भएपछि गृह जिल्ला जान पाएको छैन । दुई वटा कारणले जान पाएको छैन् । एउटा भौगोलिक हिसाबले निकै टाढा छ । धेरै दिनको तयारीका साथ जानुपर्छ । अर्को कामको व्यस्तताले पनि जान सकेको छैन् ।’

हामी राजनीतिक मान्छेलाई चाडपर्व, बिदा जस्ता कुराहरुमा एक किसिमले याद पनि हुँदैन् रैछ भन्दै पाण्डेले भने, ‘अरु सामाजिक जनजीवन त्यो बेला सुस्ता देखिन्छ । जस्तै कार्यालयहरु बन्द रहने, विद्यालयहरु, क्याम्पसहरु, मन्त्रालयहरु समेत बन्द रहन्छ । तर हामी त्यही बेला भेटघाट र कतिपय बाँकी रहेका कामहरु सम्पादन गर्नुपर्छ । त्यो हिसाबले मुख्यगरि हामी बाँकी रहेका अधुरा कामहरु सम्पादन गर्ने समयको रुपमा यसलाई उपयोग गर्न सकिन्छ कि भन्ने मुडमा छु ।’  

साँसदको भूमिकामा मात्रै हुँदा र राजनीतिक पद लिँदा खासै कार्यबोझ धेरै नभए पनि  मन्त्री भएपछि धेरै कार्यबोझ हुने उनले आफ्नो अनुभव सुनाए । त्यसले गर्दा कार्यसम्पादनका सिलसिलामा ढिला सुस्ती भएको महशुस गर्ने गरेका मन्त्री पाण्डेले यस पटकको दशैंलाई सक्दो अधुरा काम सम्पन्न गर्ने क्रममा रहेको बताए । 

यस पटकको दशैं नजिकिएको बेला बाढी पहिरोको विपत्ति आएकोले पनि खुशी भएर दशैं मनाउने परिस्थिति नरहेको उनले बताए । पाण्डेले भने, ‘दशैं अगाडि विपत्ति आइपर्यो देशमा । त्यसले मानिसहरुको जीवनमा शोक परेको अवस्था पनि छ । दुःखको स्थिति पनि छ । त्यो हिसाबले पनि यो शोकलाई बिस्तारै शक्तिमा कसरी बदल्ने ? यो शोकलाई कसरी सामान्यिकरण गर्ने ? भन्ने विषय छ । चिन्ता र शोकले मात्रा हामीलाई बलियो बनाउँदैन् । यसलाई सामान्यिकरण गर्दै दशैं, तिहार, छठ मनाउने हो । चाडपर्व भनेको दुःख, सुःख बाँड्ने समयको रुपमा प्रयोग गर्नुपर्छ । म पनि त्यही हिसाबले आफूलाई मनोवैज्ञानिक रुपमा लागेको छु ।’