यति धेरै विवादित, आलोचित र भस्मासुर सरकार चाहिँ यो पहिलोपटक हो नेपालमाः सापकोटा

काठमाडौं । प्रमुख प्रतिपक्षी दल माओवादी केन्द्रका सांसद माधव सापकोटाले वर्तमान सरकार सबै मोर्चामा असफल भएको दाबी गरेका छन् । रिपोर्टर्स क्लबमा मंगलबार उनले प्रधानमन्त्री केपी ओलीले दलाल, विचौलियो र भ्रष्टाचारीहरुको संरक्षण गरेको आरोप लगाए । 

सापकोटाले ओली सरकारलाई इतिहासकै सबैभन्दा आलोचित, विवादित र भ्रष्मासुरको संज्ञा दिँदै भने, ‘यो सरकारले आफ्नो हनिमुनको पिरियड पूरा गर्दैछ । नेपालमा अहिले मीन दाई उभिएपछि भन्नुहुन्छ, प्रतिपक्षीको धर्म भनेको आलोचना र विरोधमात्रै गर्ने हो । सत्तापक्षले आफ्नो बचाउ गर्ने भन्नुहुन्छ । उहाँ अहिले मपछि बोल्नुहुन्छ । यति धेरै विवादित, यति धेरै आलोचित र यति धेरै भस्मासुर सरकार चाहिँ यो पहिलोपटक हो नेपालमा ।’

सापकोटाले थपे, ‘अहिले बाढी, पहिरोबाट जनता विपत्तिमा हुँदा उहाँ अमेरिकामा हुनुहुन्थ्यो, यता नेपालमा क्याविनेट राख्नसमेत दिनुभएन । बरु, प्रचण्ड नै पीडितसमक्ष पुग्नुभयो । पीडितलाई ढाडस दिनुभयो । उहाँ नै पहिले पुग्नुभएको हो । उहाँ पुगेको १८ दिनपछि गृहमन्त्री, रक्षामन्त्रीको फौज बल्ल हिँड्न थालेको हो ।’

नेता सापकोटाले कांग्रेस र एमालेबीचको सहकार्यबारे टिप्पणी गर्दै एक सय दिन नपुग्दै भर्खरै भूकम्पजस्तै हल्लिएको दाबी गरे । उनले भने, ‘यो सरकार गठन भएको एक सय दिन नपुग्दै सरकार भूकम्प आएकोजति हल्लिएको थियो । आफ्नै धरातल र जग बलियो नभएपछि हल्लिएको हो । यो सरकारको स्थिति जग बलियो छैन् । राजनीतिक सहमतिको आधारमा बनेको सरकार होईन । यो विचौलियाले आफ्नो स्वार्थ सिद्ध गर्नको लागि बनाईदिएको सरकार हो । भ्रष्ट र दलालहरुले आफ्नो एकपछि अर्को फाईल खुल्दै जाने र स्वार्थमा धक्का लाग्ने भएपछि अमुक दलालहरुको घरमा रातको १२ बजे अरू कसैले आफ्नो स्वार्थको लागि बनाएको सरकार हो । यदि यो उहाँहरुले भनेकैजस्तै गुड फेथमा राजनीतिक स्थायित्व, आर्थिक समृद्धि र संविधान संशोधनको पवित्र भावनाले सोचेको हो भने कुनै एउटा राजनीतिक दलको कार्यालयमा लोकलाई राम्रोसँग बुझाएर पारदर्शी रुपमा सरकार बन्दथ्यो । अहिले त हाम्रो आरोप एकपछि अर्को प्रमाणित भैरहेका छन् ।’

सापकोटाले एमालेले व्यवसायी मीनबहादुर गुरुङको दानबाट पार्टी कार्यालयको लागि जग्गा दान लिने भनेर गरेको निर्णयको पनि आलोचना गरे । उनले भने, ‘जहाँसम्म मीनभवनको कुरा छ, यो एमालेको मात्रै सवाल रहेन । उपहार लिनेबारे कानून पनि छ । ट्रान्सपरेन्सी ईन्टरनेश्नलले त यसलाई भ्रष्टाचार ठहर गरेको छ । तर, एमालेले गिफ्टमात्रै हो भनेको छ । एमालेलाई धेरै चिन्ता छैन् । तर, देशको लागि राजनीति गर्ने हामीहरुलाई यसबारे चिन्ता छ ।’

कांग्रेसकै असहमतिको कारण प्रधानमन्त्री ओली राजनीतिक दल विभाजनसम्बन्धी अध्यादेश ल्याउनबाट रोकिएको दावी गर्दै सापकोटाले भने, ‘प्रधानमन्त्रीले हिजो साँझ ५ बजेको लागि क्याविनेट बोलाउनुभएको थियो । अध्यादेश ल्याउने कुरा भएको थियो । कांग्रेसले अस्विकार गरेपछि त्यो रोकिएको हो । सरकार अध्यादेशकै बाटोमा गएकै हो ।’

सापकोटाले प्रधानमन्त्री ओली अहिले देश, दुनियाँ र जगततर्फ नभएको आरोप लगाए । उनले भने, ‘उहाँ अघिल्लोपटक प्रधानमन्त्री हुँदा संसद् विघटन, अटोक्रेसी लाद्ने र संविधान मास्ने जुन मुडमा हुनुहुन्थ्यो, अहिले ठ्याक्कै त्यहाँ आईपुग्नुभएको छ । साना पार्टीलाई मास्ने, टुक्र्याउने, तिनलाई ल्याएर आफ्नो दलमा राख्ने र ठूलो पार्टी भएर अघि बढ्ने उहाँको सोच हो । उस्तै परे अदालतबाट नयाँ प्रकारको ब्याख्या र फैसला आयो भनेपनि आफ्नै नेतृत्वमा सरकार रहिरहोस भन्ने मुख्य अभिप्रायमा उहाँ हुनुहुन्छ ।’

नेता सापकोटाले उनले प्राकृतिक विपद्को सामना गर्न प्रधानमन्त्रीले अहिलेसम्म सबै दललाई एकतावद्ध गर्न नसकेको आरोप लगाए । उनले भने, ‘यो विपत्तिको क्षति भुकम्पजस्तै हो । घरघरमा भकारीको धान सकिँदैछ । किसानको धानखेत बगरमा परिणत भएको छ । मेरै निर्वाचन क्षेत्रको कुरा गर्दा तातोपानीमा मालवाहक गाडी ल्याउन सकिएको छैन् । अहिले सरकारका मन्त्रीहरुले हामीले बनाएको अस्थायी पुल उद्घाटन गर्नुभएको छ ।’

सांसद सापकोटाले अहिलेको सरकार जुन अभिप्रायको लागि जन्मिएको हो त्यसमा भने सफल रहेको टिप्पणी गरे । उनले भने, ‘सरकार जुन अभिप्रायले बनेको हो, त्यो काम चाहीँ उसले गरिरहेको छ । भ्रष्टाचारीको संरक्षक गर्ने भनेको हो । दलाल र विचौलियाहरुको सेवा गर्ने भनेको हो । त्यो काम गरिरहेको छ । जनता विपत्त र आपत्तमा छन् । सरकारले साझा संकल्प ल्याएन । यो सरकार जनताको कामबाट च्यूत छ । कसरी अटोक्रेसी लाद्ने भनेर सरकार र प्रधानमन्त्री त्यसमा केन्द्रित छन् ।’

नेपाली कांग्रेसका नेतालाई राजनीतिक दल विभाजनसम्बन्धी अध्यादेश ल्याउन नदिने आफ्नो अडानमा अडिग रहन सापकोटाले आग्रह गरे । उनले भने, ‘अध्यादेश ल्याउने र अर्काको पार्टी फुटाउने खेलोमेलोमा जाने हो भने कांग्रेसपनि केपी ओलीसँगै सति जाने हो । त्यतिवेला जनताले रामराम मात्रै भन्ने हो ।’ सापकोटाले केपी ओलीले एमालेभित्रै पनि पार्टी कार्यालय भवन बनाउने विषयमा आफ्नो कुरा राख्नेहरुमाथि दमन गरेको बताए ।

उनले कीर्तिपुरमा बन्न लागेको एमाले मुख्यालय मीनभवनको कारण प्रधानमन्त्री ओली र उनको पार्टीमाथि हमला भएपछि त्यसको विषयान्तर गर्नको लागि हतारिएर राष्ट्रिय स्वतन्त्र पार्टीका सभापति रवि लामिछानेलाई पक्राउ गरिएको आरोप लगाए । सापकोटाले भने, ‘रविजीलाई मात्रै पक्राउ गर्नतर्फ किन गयो त?  कांग्रेसका उपसभापति धनराज गुरुङ र एमाले नेता ऋषिकेश पोखरेलको नाम मिडियामा दिनकै आउँछ । उहाँहरुको त रविजीको भन्दापनि बढि छ्याङ्छ्याङ्ती देखिनेगरि प्रमाण आयो । धनराजले त अहिलेका दानवीर मीनवहादुरसँगै सापटी लिएर तिरेको बयान दिइसक्नुभयो । साबिती बयान दिनुभयो । यसले के देखाउँछ भने आफ्नाहरु जतिलाई जोगाउने र संरक्षण गर्ने, आफूलाई पालनपोषण गर्ने, चन्दा दिने, दान–भेटी दिनेहरुको संरक्षण गर्ने, आफ्नो विरुद्धमा जानेहरुलाई समातेर थुन्ने निरंकुशतातर्फ जान खोजेको आशंका छ । सरकारको एक सय दिनको समिक्षा गर्दा सम्पूर्ण रुपमा असफल भएको छ । यो सरकारले  भ्रष्टाचारीलाई संरक्षण गरेको छ । सरकारले लय बिगारेको छ ।’