काठमाडौंः राजधानीको कमलादीमा बुधबार साँझ गोली चलेको छ । कमलादीस्थित हेरिटेज प्लाजामा रहेको होटलमा गोली चलेको प्रहरीले जानकारी दिएको छ ।
गोली चले लगत्तै पुगेको प्रहरीले दुर्इ जनालाई नियन्त्रणमा लिएको छ । पक्राउ पर्नेमा भारतको लुदियानाका गगनदीप सिंह र जसबिन सिंह रहेको जनाइएको छ ।
मंगलबार साँझ कमलादीस्थित होटल हिमालय दर्शनमा आएर बसेका उनीहरु भी एक्स आई मोडलको स्वीफ्ट गाडीमा सुनौलीबाट काठमाडौं आएका थिए ।
भारत उत्तर प्रदेशको युपी नम्बर प्लेट रहेको उक्त गाडी पनि प्रहरीको नियन्त्रणमा आएको छ । पक्राउ परेकाहरुमाथि अनुसन्धान सुरु भएको भन्दै प्रहरीले उनीहरुको साथबाट एउटा पेस्तोल र ५० राउण्ड गोली बरामद भएको जानकारी दिएको छ ।
हेरिटेजस्थित होटलमा खाजा खाएपछि पैसा तिर्ने विषयमा विवाद हुँदा ती भारतीयले एक राउण्ड हवाई फायर गरेको र त्यस क्रममा कुनै मानवीय क्षति भने नभएको जनाइएको छ । हवाई फायर हुनासाथै खबर आएका प्रहरीले ती भारतीयलाई नियन्त्रणमा लिएका हुन ।
