आइतबार २ मंसिर, २०८१ | Sunday Nov 17, 2024
आइतबार २ मंसिर, २०८१ | Sunday Nov 17, 2024
काठमाडौँ। भारतको गुवाहाटीमा जारी ६४औँ संस्करणको बोर्डोलोई ट्रफी फुटबल प्रतियोगिताको उपाधिका लागि शुक्रबार नेपालको थ्रीस्टार क्लबले घरेलु टोली इस्ट बङ्गाल क्लबसँग प्रतिस्पर्धा गर्दैछ ।
नेपाली राष्ट्रिय लिग विजेता थ्रीस्टारले सिक्किम युनाइटेड र इस्ट बङ्गालले सिलोङ लाजोङ फुटबल क्लबलाई पराजित गर्दै उपाधिका लागि भिडन्त पक्का गरेका हुन् । छ वर्षअघि प्रतियोगिताको अन्तिमचरणमा पुगेर उपाधि जित्न असफल थ्रीस्टारले प्रतियोगिताकै बलियो टोली इस्ट बङ्गाललाई फाइनलमा प्रतिद्वन्द्वी पाएको हो ।
थ्रीस्टारले समूह चरणमा नागाल्यान्डलाई ६–१ ले पराजित गरेको थियो भने सिलोङ लाजोङ र ओयल इन्डियासँग १–१ गोलको बराबरी गरेको थियो । एक महिनाअघि एएफसी कपको प्लेअफमा छनोट भएको थ्रीस्टारले सेमिफाइनलमा सिक्किम युनाइटेडलाई अतिरिक्त समयको खेलमा ४–१ गोल अन्तरले पराजित गरेको थियो । थ्रीस्टारले विपक्षीको पोष्टमा १२ गोल गरेको छ भने चार गोल मात्र ब्यहोरेको छ ।
जारी प्रतियोगितामा एक गोल पनि नखाएको इस्ट बङ्गालले विपक्षीको पोस्टमा १२ गोल गरेको छ । समूह चरणमा इस्ट बङ्गालले बङ्गलादेशका बोनगोबिर ओग्रागामी क्लबलाई ६–० ले हराएको थियो भने सिक्किम युनाइटेडलाई २–० ले तथा गुवाहाटीको स्थानीय क्लबलाई ३–० ले हराएको थियो । सेमिफाइनलमा उसले सिलोङ लाजोङलाई १–० ले पराजित गरेको थियो । फाइनल खेल गुवाहाटीस्थित नेहरु स्टेडियममा आज अपराह्न सुरु हुनेछ । रासस
