काठमाडौंः इन्डियन प्रिमियर लिग (आइपीएल) क्रिकेट प्रतियोगितामा आज हुने चेन्नाई सुपर किंग्सविरुद्ध दिल्ली डेयर डेभिल्सको खेलमा नेपाली युवा क्रिकेटर सन्दीप लामिछाने खेल्ने सम्भावना उच्च रहेको छ । लिगको उपाधि होडबाट बाहिरीसकेको दिल्लीको १३औं खेलमा सन्दिपको खेल्ने सम्भावना उच्च रहेको हो ।
उनले आइपीएलमा दिल्लीको १२औं खेलमा डेब्यु गर्दै सानदार प्रदर्शन गरेका थिए । सन्दीपले गरेको ४ ओभरको बलिङमा २५ रन मात्र खर्चिएर टोलीलाई १ विकेट दिलाएका थिए ।
प्रतियोगितामा आठ खेलमा जित दर्ता गरेको चेन्नाई १६ अंकका साथ दोस्रो स्थानमा छ । आज दिल्लीविरुद्धको खेल पनि जित्न सके चेन्नाई प्रतियोगिताको शीर्ष दुईमा रहेन पक्का हुने छ । तर, दिल्लीका लागि भने यो खेल प्रतिष्ठाको लडाँई मात्र हुने छ । दिल्लीको १२ खेलबाट मात्र छ अंक रहेको छ ।
सुरुवाती ११ मा ४ जना मात्र विदेशी खेलाडी खेलाउन पाउने भएकाले सन्दीपलाई मैदान उत्रन मुस्किल भएपनि ब्याङलोरविरुद्धको खेलमा उत्कृष्ट प्रदर्शन गरेपछि भने सम्भावना बढेको छ ।
