काठमाडौँः यसअघिको विश्वकप फुटबल विजेता जर्मनी दक्षिण कोरिया जस्तो कमजोर मानिएको टिमसँग २–० ले पराजित भएको छ । आज भएको खेलमा पराजय भोगेसँगै यस पटकको लागि जर्मनीको विश्वकप यात्रा अन्त्य भएको छ ।
दक्षिण कोरियासँग अप्रत्यासिहत हार व्यहोरेपछि जर्मनीका धेरै समर्थकहरुको आँखामा आँशु बगेको थियो । दक्षिण कोरियाविरुद्धको समूह चरणको अन्तिम खेलमा अप्रत्यासित पराजय भोगेपछि जर्मनीका खेलाडीहरु पनि हैरान र निराश देखिन्थे ।
समूह एफ को अन्तिम खेलमा दक्षिण कोरियाले खेलको अतिरक्ति समयको चार मिनेटभित्र दुई गोल गर्दै साविक विजेता जर्मनीलाई घर पठाएको विषयले धेरैलाई आश्चर्य चकित बनाएको छ भने कोरियालीहरुमा भने खुशीयाली छाएको छ ।
दक्षिण कोरियाले यसअघि दुई खेलमा पराजित भएकाले आजको खेलमा जिते पनि समूह चरण पार गर्ने अवस्था थिएन । तर, जर्मनीको त्यो संभावना थियो । दक्षिण कोरियासँग पराजित भएपछि जर्मनी ३ अंकसहित समूहको सबैभन्दा पुच्छरमा पुगेको छ ।
दक्षिण कोरियालाई सनसनीपूर्ण जित दिलाउने क्रममा खेलको अतिरिक्त समयको चौथो मिनेटमा किम योङ व्गान र ९८ औँ मिनेटमा हेयुङ मिन सनले गोल गरे ।
यो समूहबाट ६ अंकसहित स्विडेन समूह विजेता बन्दै अन्तिम १६ मा पुगेको छ भने ६ अंक नै जोडेको मेक्सिको गोल अन्तरले पछि पर्दै उपविजेता बनेर अन्तिम १६ मा पुगेको छ ।
