बडिमालिका क्षेत्रको विकासका लागि हेलिटुर आयोजना गरिँदै

काठमाडौं । नेपाल पर्यटन बोर्डको प्रवर्द्धनमा सुदुरपश्चिमको बडिमालिका क्षेत्रको विकासका लागि हेलिटुर आयोजना गरिने भएको छ । 

फागुन १ गतेबाट १० दिनका लागि पहिलो चरणमा विभिन्न प्याकेजसहित सो टुरको आयोजना गरिने नेपाल एशोसिएसन अफ टुर एण्ड ट्रावल एजेन्टन्स (नाटा) सुदुरपश्चिमले शुक्रवार पर्यटन बोर्डमा आयोजना गरेको पत्रकार सम्मेलनमा जानकारी दिइयो । 

यात्रुहरुलाई स्थानको हिसाबले १२ हजार देखि ४० हजारसम्मका प्याकेजहरु उपलब्ध गराइने आयोजकले जानकारी दिएका छन् । पत्रकार सम्मेलनमा नेपाल पर्यटन बोर्डका सदस्य कृष्ण शाहले आर्थिक विकासको लागि आन्तरिक पर्यटनलाई चलायमान बनाउन आवश्यक रहेको भन्दै कोरानाले सुस्ताएको पर्यटनलाई चलायमान बनाउन यो कार्यक्रम सहयोगी हुने बताए । 

बोर्डका वरिष्ठ निर्देशक हिक्मत सिंह ऐरले सुदुरपश्चिम भारतका विभिन्न शहरसँग जोडिएकोले यो कार्यक्रममा भारतीय पर्यटकलाई समेत ल्याउन सकिने बताए । उनले  सुदुरपश्चिमको पर्यटन प्रवर्द्धनका लागि बोर्डले सो क्षेत्रमा मार्टको आयोजना गर्ने समेत जानकारी दिए । 

नाटाका केन्द्रीय अध्यक्ष अच्युत गुराँगाईले  सुदुरपश्चिम प्रदेश पर्यटनका लागि ‘भर्जिन ल्याण्ड’ भएको उल्लेख गर्दै यो कार्यक्रमले सो क्षेत्रको पर्यटन प्रवर्द्धनमा सहयोग पुग्ने बताए । यस्तै नाटा सुदुरपश्चिमका सल्लाहकार नरेन्द्रदेव भट्टले सुदुरपश्चिम प्रदेशमा पर्यटनको प्रचुर सम्भावना रहेकोले आर्थिक विकासका लागि त्यसको प्रवर्द्धन गर्न आवश्यक रहेको बताए । 

माउण्टेन हेलिकोप्टरका महाप्रबन्धक डीलबहादुर ओलीले नाफाभन्दा पनि सो क्षेत्रको पर्यटन प्रर्वद्धनका लागि लागत मुल्यमै कम्पनीले टुर प्याकेज ल्याएको जानकारी दिए । 

नाटाका सुदुरपश्चिम अध्यक्ष मायाप्रकाश भट्टले सुदुरपश्चिम कै प्रमुख पर्यटकीय गन्तव्य खप्तड बडिमालिका लगायतका स्थलमा अहिले हिउँले सेत्याम्मे रहेकाले उक्त क्षेत्रको भ्रमण गर्ने चाहना भएका तर समय अभावका कारण जान नसक्ने पर्यटकहरुका लागि यो कार्यक्रम फलदायी हुने बताए । 

नाटाको सचिव शिवहरि पाण्डले १० दिनको अवधिमा कम्तिमा पनि ३५० जना आन्तरिक पर्यटकलाई खप्तड र बडिमालिका भ्रमण अबलोकन गराउने लक्ष्य लिएको बताए ।