कोभिडले थला परेको पर्यटन क्षेत्र लयमा फर्किने संकेत, तर मन्त्रालय–बोर्ड द्धन्द्धले काममा बाधा

काठमाडौं। कोरोना महामारी र त्यसलाई नियन्त्रण गर्न लागू गरिएको बन्दाबन्दी तथा निषेधाज्ञाले थला परेको पर्यटन क्षेत्र विस्तारै लयमा फर्किन लागेको छ । 

कोरोना महामारीका कारण पर्यटकीय गतिविधि ठप्प जस्तै गएको समयमा पर्यटक आगमनमा सामान्य वृद्धि देखिएको हो । गत वर्षको जनवरी महिनाको तुलनामा यस वर्ष महिनामा विदेशी पर्यटकको आगमन बढेको नेपाल पर्यटन बोर्डले तथ्यांकबाट देखिएको हो । 

लामिछानेले भने, ‘अक्टोबर, नोभेम्बरको र डिसेम्बरको तथ्यांक विश्लेषण गर्दा प्रवृत्ति सम्हालिसकेको थियो २०१९ कै लयमा । बीचमा ओम्निक्रोमको कारण डिसेम्बरमा पर्यटन गतिविधि घट्यो । तर जानवरीदेखि प्रवृत्ति पहिलकै गतिमा आएको छ ।’ 

अघिल्लो बर्षको जनवरीको तुलनामा अहिले झण्डै दोब्बरले पर्यटक बढ्नुलाई आफूलाई सकारात्मकरुपमा लिएको उनले बताए । लामिछानेले अहिले ट्रेकिङ र पर्वतारोहणमा जाने पर्यटकहरु पनि निकै बढे्को बताए । भारतबाट आउने पर्यटकभन्दा युरोप र अमेरिकाबाट आउनेको चाप पनि बढेको उनले जानकारी दिए । कोरोना संक्रमण घटेसँगै पर्यटकीय चहलपहल लयमा फर्किन सुरु भएको लामिछानेको भनाई छ । 

पर्यटन प्रवद्र्धनको विषयमा पर्यटन मन्त्रालयसँग पनि बोर्डको कुराकानी भइरहेको बताउँदै सरकारी कर्मचारीलाई देशदर्शनसम्वन्धी कार्यविधि बनाएर मन्त्रालयमा पेश भएको र त्यो पास हुने अन्तिम चरणमा रहेको बताएको छ । 

निर्देशक लामिछानेले उक्त कार्यविधि पास भएर आएपछि सकारात्मक सन्देश प्रवाह गर्ने र पर्यटन क्षेत्रमा सकारात्मक प्रभाव पार्ने बताए । उनले भने, ‘नेपालीहरुले स्वदेश मात्र होइन विदेश पनि बिस्तारै घुम्न थालेको देखिन्छ । अहिले विदेशी पर्यटकहरुको बुकिङहरु पनि आउन थालेको छ । मार्चका लागि ट्रेकिङको बुकिङ र इन्क्वायरी पनि धेरै आइरहेको छ ।’

पर्यटन क्षेत्रले लय समाउन खोजे पनि पछिल्लो समयमा पर्यटन मन्त्रालय र पर्यटन बोर्डबीच चलेको द्धन्द्ध समस्याको रुपमा देखा परेको छ । बोर्डका सीईओ हटाउने र नयाँ नियुक्ति गर्न नयाँ पर्यटनमन्त्री प्रेम आले लागेपछि कोभिड प्रभावित पर्यटन क्षेत्र पुनःस्थापनमा बाधा उत्पन्न भएको हो । 

पर्यटन क्षेत्रको राहतका लागि सरकारले बजेटमार्फत सरकारी कर्मचारीलाई घुम्न बिदा दिने निर्णय गरे यही द्धन्द्धका कारण कार्यविधि जारी गर्न ढिलाई भएको छ भने पर्यटन क्षेत्रसँगसम्वन्धित थुप्रै नीतिगत र प्रक्रियागत कामहरुसमेत अहिले अलपत्र अवस्थामा पुगेको छ । यद्यपि पछिल्लो समयमा पर्यटन बोर्डका सीईओलाई हटाउने र नयाँ राख्ने नयाँ मन्त्रीको खेललाई अदालतले रोक लगाइदिएबाट यस क्षेत्रमा केही काम हुने आशा गरिएको छ ।