महामन्त्री पद त्याग्ने गगन थापाको इच्छा, ‘दाग लागेको कांग्रेसको महामन्त्री बन्नु छैन्’

महामन्त्री पद त्याग्ने गगन थापाको इच्छा, ‘दाग लागेको कांग्रेसको महामन्त्री बन्नु छैन्’ 
काठमाडौं । नेपाली काँग्रेसका महामन्त्री गगन थापाले काँग्रेस बदल्ने अभियानमा आफू लागि परेको बताएका छन् । एउटै व्यक्ति ५–६ पटक प्रधानमन्त्री बन्ने कुराले पार्टी नचल्ने भएकाले काँग्रेस, एमाले र माओवादी जस्ता पुराना पार्टीहरु आज एकसाथ संकटमा पर्न गएको बताएका छन् । 

नेपाली कांग्रेस दोलखा–काठमाडौं सम्पर्क समितिको कार्यक्रममा शनिबार थापाले आफूले व्यक्तिको नभई पार्टी नै बदल्ने कुरा गरेको बताए । उनले डेमोक्रेसीमा एउटै व्यक्ति पटकपटक प्रधानमन्त्री हुने कुनै पनि देश नभएको दावी समेत गरे । थापाले काँग्रेस बदल्नका लागि आफू महामन्त्री पद त्याग गर्न पनि तयार रहेको घोषणा पनि गरे । 

थापाले भने, ‘संसारमा एउटा त्यस्तो देश मलाई बताई दिनुस्, जुन देशमा व्यक्ति, एउटा नेता ५ पटक, ६ पटक प्रधानमन्त्री भएको देश मलाई बताईदिनुस् । कहीँ हुँदैन । कुनै डेमोक्रेसीमा हुँदैन । नेपालमा आज किन पुरानो पार्टी संकटमा छन् ? थाहा छ ? काँग्रेस, एमाले, माओवादी पार्टी सबै एकसाथ संकटमा पर्नुको थुर्पै कारण मध्येको मूल कारण भनेको ती पार्टीको नेताहरु खासगरी पार्टीहरु जमेको पोखरी जस्तो भयो । कुनै व्यक्तिको दोष होइन । तर यस्तो कहीँ हुन्छ ? २० वर्षदेखि, २५ वर्षदेखि, ३० वर्षदेखि नेता नबदल्ने कुनै पनि पार्टी हुँदैन । सबै ठाउँमा हुन्छ । यो डेमोक्रेसीमा कि लगातार चुनाव जितेको जित्यै हुन्छ । पार्टीहरु त्यसरी बन्दैन । पोलिटिक्समा पनि एक्जिटको व्यवस्था गरिएको हुन्छ । हामी कहाँ एक्जिटको व्यवस्था गरिएन् ।’ 

उनले थपे, ‘म उमेरको पनि कुरा गर्दिन् । काँग्रेसमा हामीभन्दा पनि पाको एकसेएक जोश भएको, सोच भएको नेताहरु हुुनुहुन्छ । हामी अमेरिकाको बाईडेनको कुरा गर्छौं । उमेर पनि होइन । त्यही अमेरिकामा एउटा व्यक्ति दुई पटक भन्दा बढि राष्ट्रपति नहुने परम्परा पनि छ नि त । प्रत्येक देशले केही न केही परम्परा बनाएको हुन्छ । कि दुई पटक भन्दा बढि राष्ट्रपति हुँदैन । बेलामा व्यक्ति चुनाव लडछ । चुनाव लडदै गर्दा पार्टीले संसदीय दलको नेता छान्छ । उसको नेतृत्वमा पार्टी चुनावमा जान्छ । पार्टीे बहुमत ल्याएन भने त्यो मान्छे भोलीपल्टबाट राजनीतिमा बस्दै बस्दैन । एक पटक प्रधानमन्त्री छोडेपछि ऊ फर्केर प्रधानमन्त्री हुन आउँदैन बेलायतमा । प्रत्येक देशले यस्तो केही न केही परम्परा बनाएका छन के । पद्धति बनाएका छन् । अनि मात्र डमोक्रेसी चल्छ ।’ 

नेपालमा असल राजनीतिक परम्परा बस्न नसकेको बताउँदै थापाले नेपालमा त्यो परम्परा कसले बसाउँछ ? भनी प्रश्न गरे । आफूले काँग्रेसभित्र विधि बसाल्ने, थिति बसाल्ने कुरा गरेको बताए । उनले यो कुनै गुटको कुरा होइन्, कुनै आदरको कुरा होइन भन्दै खुला छलफल गर्नु जरुरी रहेको बताए । 

थापाले भने, ‘नयाँ परम्परा र थिति बसाल्ने कुरा नगर्ने ? यो गर्यौं भने मलाई अहिले पनि के विश्वास छ भने कोही साथीहरु आत्तिनुपर्र्दैन । अघि नै यहाँ चर्चा भएको छ । आजको दिनमा नेपाली काँग्रेसले आत्मनिन्दा गरेर, काँग्रेस सक्कियो भनेर छाति पिटेर, रोएर, कराएर, बौलाएर हिँडेर पनि केही हुँदैन । सक्किएको छैन् । कसैले सक्काएर सकिदैन ।’ 

काँग्रेसले आत्म निन्दा गरेर पनि हुँदैन्, अहंकार पालेर पनि हुँदैन् भन्दै उनले काँग्रेसले आजको दिनमा गर्नुपर्ने भनेको आत्म अवलोकन हो भने । बदलिएको काँग्रेसले मात्रै देश बदल्नसक्ने थापाले बताए । उनले काँग्रेस बदल्न हामी प्रत्येक बदलिन तयार हुनुपर्ने बताए । थापाले भने, ‘म बदलिन तयार छु । म बदलिन तयार छ भनेको मैले पटकपटक भनेको छु– दाग लागेको काँग्रेसको महामन्त्री हुनु भन्दा सफा काँग्रेसको कार्यकर्ता मात्रै भएर बस्दा बडो मजा आउँछ ।’