ट्रम्पको आगमनले नेपालमा मात्रै होइन, विश्व परिवेशमा नै परिवर्तन आउँछः श्रेष्ठ

काठमाडौं । कुटनीतिज्ञ हिरण्यलाल श्रेष्ठले अमेरिकामा डोनाल्ड ट्रम्प राष्ट्रपतिमा निर्वाचित भएपछि विश्व परिवेशमा नै परिवर्तन आउने हुँदा नेपालले आर्थिक कुटनीतिलाई जोड दिनुपर्ने बताएका छन् । 

बिहीबार रिपोर्टर्स क्लबमा उनले अमेरिका अहिले पनि एक नम्बरको महाशक्ति राष्ट्र भएकोले अमेरिकाको निर्वाचन र नयाँ राष्ट्रपति आउँदा विश्वभरि नै असर पर्ने बताए । 

उनले नेपालले अमेरिका र चीनबीच राम्रो सम्बन्ध होस भन्ने चाहेको बताए । श्रेष्ठले थपे, ‘नेपाल चीनसँग सीमा जोडिएको देश हो । अमेरिका र चीनबीच द्धन्द्ध बढ्दै गयो भने चीनलाई छेक्ने नीति ट्रम्पले अपनाउँछ । विश्वभरि युद्ध नचर्कियोस भन्ने अमेरिकामा पनि दबाब छ । हामीलाई त अमेरिका र चीनबीच राम्रो सम्बन्ध होस भन्ने छ ।’

श्रेष्ठले अहिले पनि अमेरिका र भारतबीच राम्रो सम्बन्ध नभएको खुलासा गरे । उनले भने, ‘भारतको हालैको निर्वाचनमा मोदीलाई साइज डाउन गर्न र झण्डै हराउन अमेरिका लागेको थियो, मोदीले मुस्लिम र क्रिश्चियनलाई भेदभाव गर्यो भनेर । काश्मिर इस्युमा अमेरिका र भारतको कुरा मिल्दैन् । चीनविरोधी गतिविधि गर्नमात्रै अमेरिका र भारत मिल्छन् । अहिले चीनसँग भारतले सम्बन्ध सुधार गरेको छ । बहुध्रुवीय विश्वनेताहरुमध्ये मोदी र सि जिनपिङ हो ।’

श्रेष्ठले अमेरिकाको राष्ट्रपतिको रूपमा दोस्रो कार्यकाल जितेका ट्रम्पसामू पनि चूनौति रहेको बताए । उनले भने, ‘युक्रेन युद्धपछि एक ध्रवीय नीति फेल भएर बहुध्रुवीय विश्व निर्माण भएको छ । अहिले भारत, रुस, चीन, इरान, इण्डोनेसिया बहुध्रवीय विश्व निर्माणमा लागेका छन् । नेपालको हितपनि बहुध्रुवीय विश्व व्यवस्थामा छ । नेपालमा यसपालि सरकार कमजोर भएकोले पाकिस्तानको सांघाई कोअपरेशनमा निम्तो आएन । नेपालले द्धिपक्षीय सम्बन्ध भारत, चीन, अमेरिका सबैसँग राख्नुपर्छ । दुई छिमेकी मुलुक भारत र चीनविरुद्ध अरू तेस्रो मुलुकसँग गठबन्धन गर्नुहुँदैन । हामीले कसैको पनि सैनिक छाता ओढ्नुहुँदैन् । ट्रम्पको पालामा नाफा र घाटाको हिसाब हुन्छ । यो बेलामा हामीले पनि इकानोमी डिप्लोमेसीलाई प्राथमिकतामा राख्नुपर्छ । हामी कसैको पनि सुरक्षा तानातानमा नफस्ने हुनुपर्छ । जापान, इयु सबैसँग सहयागे लिनुपर्छ । इस्ट–वेष्ट हाईवे बनाउँदा सबै देशको सहयोग लिएजस्तै हामीले सबैसँग सहयोग लिन सक्नुपर्छ । नेपालले चीन, भारत र अमेरिका कसैको बेस बन्न दिँदैन् । सबैसँग मित्रता बढाऔं, कसैको सुरक्षा पुच्छर नबनौं ।